ഫോർട്രാൻ
പ്രോഗ്രാമിങ് ഭാഷ / From Wikipedia, the free encyclopedia
ഒരു വിവിധോദ്ദേശ്യ പ്രോഗ്രാമിങ് ഭാഷയാണ് ഫോർട്രാൻ (ഇംഗ്ലീഷിൽ മുൻപ് FORTRAN എന്ന് മുഴുവൻ വലിയ അക്ഷരത്തിലെഴുതിയിരുന്നെങ്കിലും ഇപ്പോൾ Fortran എന്നാണ് ഉപയോഗിക്കുന്നത്). പലതരം കമ്പ്യൂട്ടർ രൂപകൽപ്പനകളിൽ വ്യാപകമായി ഉപയോഗിക്കപ്പെട്ട ആദ്യത്തെ ഹൈലെവൽ പ്രോഗ്രാമിങ് ഭാഷയാണ് ഫോർട്രാൻ[അവലംബം ആവശ്യമാണ്]. ഗണിതക്രിയകൾക്കും ഗവേഷണകാര്യങ്ങൾക്കുമാണ് ഇത് കൂടുതൽ യോജിക്കുന്നത്. ശാസ്ത്രസാങ്കേതികരംഗത്തെ ഉപയോഗങ്ങൾക്കായി 1950-കളിൽ ഐ.ബി.എം. ആണ് കാലിഫോർണിയയിലെ തെക്കൻ സാൻ ഹോസെയിൽ വച്ച് ഈ ഭാഷ വികസിപ്പിച്ചത്.[1] പ്രോഗ്രാമിങ്ങിന്റെ മേൽപ്പറഞ്ഞ മേഖലകളിൽ തുടക്കം മുതലേ ആധിപത്യം സ്ഥാപിച്ച ഈ ഭാഷ കഴിഞ്ഞ അരനൂറ്റാണ്ടുകാലമായി കാലാവസ്ഥാപ്രവചനം, ഫൈനൈറ്റ് എലെമെന്റ് അനാലിസിസ്, കമ്പ്യൂട്ടേഷണൽ ഫ്ലൂയിഡ് ഡൈനമിക്സ്, കമ്പ്യൂട്ടേഷണൽ ഫിസിക്സ്, കമ്പ്യൂട്ടേഷണൽ കെമിസ്ട്രി തുടങ്ങിയ തീക്ഷ്ണമേഖലകളിൽ ഉപയോഗിക്കപ്പെട്ടുവരുന്നു. മികച്ച കമ്പ്യൂട്ടിങ് പ്രകടനം ആവശ്യമായ മേഖലകളിലെ ഏറ്റവും പ്രശസ്തമായ ഭാഷകളിലൊന്നാണിത്[2] ലോകത്തെ ഏറ്റവും വേഗതയേറിയ സൂപ്പർ കമ്പ്യൂട്ടറുകളെ നിർണ്ണയിക്കുന്നതിനും മറ്റുമുള്ള പ്രോഗ്രാമുകൾ എഴുതുന്നതിനും ഫോർട്രാൻ ഉപയോഗിക്കപ്പെടുന്നു. ദ് ഐ.ബി.എം. മാത്തെമറ്റിക്കൽ ഫോർമുല ട്രാൻസ്ലേറ്റിങ് സിസ്റ്റം എന്നതിൽ നിന്നാണ് ഫോർട്രാൻ എന്ന പേരുണ്ടായത്.
ദ് ഫോർട്രാൻ ആട്ടോമാറ്റിക് കോഡിങ് സിസ്റ്റം ഫോർ ദ് ഐ.ബി.എം. 704 (1956 ഒക്ടോബർ 15), ഫോർട്രാൻ പ്രോഗ്രാമർമാർക്കുള്ള ആദ്യത്തെ റെഫറൻസ് കൈപ്പുസ്തകം | |
ശൈലി: | വിവിധശൈലികൾ: ഘടനാപരം, ഇംപരേറ്റീവ് (പ്രോസീജറൽ, ഓബ്ജക്റ്റ് ഓറിയെന്റഡ്), ജെനറിക് |
---|---|
പുറത്തുവന്ന വർഷം: | 1957 |
രൂപകൽപ്പന ചെയ്തത്: | ജോൺ ബാക്കസ് |
വികസിപ്പിച്ചത്: | ജോൺ ബാക്കസ് & ഐ.ബി.എം. |
ഡാറ്റാടൈപ്പ് ചിട്ട: | strong, static, manifest |
പ്രധാന രൂപങ്ങൾ: | ആബ്സോഫ്റ്റ്, ക്രേ, ജി.ഫോർട്രാൻ, ജി.95, ഐ.ബി.എം., ഇന്റൽ, ലാഹി/ഫ്യൂജിത്സു, ഓപ്പൺ വാട്ട്കോം, പാത്ത്സ്കേൽ, പി.ജി.ഐ., സിൽവർഫ്രോസ്റ്റ്, ഒറക്കിൾ, എക്സ്.എൽ. ഫോർട്രാൻ, വിഷ്വൽ ഫോർട്രാൻ തുടങ്ങിയവ |
സ്വാധീനിക്കപ്പെട്ടത്: | സ്പീഡ്കോഡിങ് |
സ്വാധീനിച്ചത്: | അൽഗോൾ 58, ബേസിക്, സി, പി.എൽ./`, പാക്റ്റ് I, മംപ്സ്, റാറ്റ്ഫോർ |
ഫോർട്രാന് പതിപ്പുകളുടെ വിപുലമായ പരമ്പരയുണ്ട്. ഓരോ പതിപ്പും ഭാഷയിൽ കൂടുതൽ സൗകര്യങ്ങൾ ചേർത്തുകൊണ്ടും ഒപ്പം മുൻപതിപ്പുകളുമായി യോജിപ്പ് നിലനിർത്തിയുമാണ് വികസിച്ചുവന്നത്. ഘടനാപരമായ പ്രോഗ്രാമിങ്, അക്ഷരരൂപത്തിലുള്ള വിവരങ്ങളുടെ സംസ്കരണം (ഫോർട്രാൻ77), അരേ പ്രോഗ്രാമിങ്, മോഡുലർ പ്രോഗ്രാമിങ്, ജെനറിക് പ്രോഗ്രാമിങ് (ഫോർട്രാൻ 90), ഹൈ പെർഫോമൻസ് ഫോർട്രാൻ (ഫോർട്രാൻ 95), ഓബ്ജക്റ്റ് ഓറിയെന്റഡ് പ്രോഗ്രാമിങ് (ഫോർട്രാൻ 2003), കൺകറണ്ട് പ്രോഗ്രാമിങ് (ഫോർട്രാൻ 2008) തുടങ്ങിയവ ഫോർട്രാൻ പതിപ്പുകളിൽ കാലക്രമേണ കൂട്ടിച്ചേർക്കപ്പെട്ട സൗകര്യങ്ങളാണ്.