Masacres hamidianes
From Wikipedia, the free encyclopedia
Les masacres hamidianes, conocíes tamién como les masacres armenies de 1894-1896, faen referencia a les distintes matances y asesinatos coleutivos que, nesos años, sufrieron los armenios del Imperiu otomanu y que les sos baxes envalórense entre unes 200.000 y 300.000 persones. Reciben esti nome del sultán reinante nesos años, Abdul Hamid II, quien nel so esfuerciu de caltener la integridá territorial del imperiu adoptó'l panislamismu como ideoloxía d'estáu. Anque les masacres taben destinaes mayoritariamente a los armenios, delles poblaciones cristianes como los asirios tamién fueron víctimes.
La crisis política, social y económica que travesó l'Imperiu otomanu nel postreru terciu del sieglu XIX foi'l caldu de cultivu qu'afaló l'enfrentamientu ente la población musulmana y les minoríes cristianes, y especialmente contra la comunidá armenia. El gobiernu autoritariu del sultán Abdul Hamid II tuvo qu'enfrentase a les crecientes demandes ya inxerencies de les potencies europees, y nesi contestu los pidimientos de la comunidá armenia de mayor democracia y derechos sociales fueron reprimíes cola mayor durez por aciu matances y masacres coleutives contra'l gruesu de la población armenia. Les revueltes o protestes entamaes o empobinaes por miembros de los partíos nacionalistes armenios sirvieron de xustificación pa usar la violencia tanto contra los activistes o disidentes armenios como sobro la población polo xeneral.[1]
Sicasí, dalgunes d'eses rebeliones sirvieron sicasí pa evitar esi tipu de castigos indiscriminaos contra los pueblos y comunidaes onde habitaben los armenios.