高句麗
From Wikipedia, the free encyclopedia
高句麗(句麗讀勾離,粵拼:gou1 ngau1 lei4[註 1];韓文:고구려/高句麗 Goguryeo)係一個位於東北亞嘅古國。根據朝鮮史書同埋中國史書記載,公元前37年,扶餘王子高朱蒙南下,喺卒本川建立高句麗。建國後嘅高句麗不斷對外擴張,吞併咗扶餘、沃沮同埋東濊嚟啲周邊嘅國家,之後仲喺中國五胡亂華嗰時吞併咗漢四郡。高句麗喺朝鮮半島同百濟、新羅兩國形成三國鼎立局面。到咗好太王同埋長壽王嘅統治期間,高句麗進入全盛時期,並喺之後嘅成個世紀入面保持對新羅、百濟兩國嘅壓倒性優勢,控制住而家朝鮮半島北部同埋宜家中國東北地區嘅南部。隋唐時期,高句麗由於不斷咁同隋唐皇朝交戰而開始衰弱。668年,高句麗畀唐朝同埋新羅聯手滅咗。高句麗存在咗705年,喺東亞歷史入面扮演住一個好重要嘅角色。佢曾經做低入侵朝鮮半島嘅倭寇,並做低隋朝嘅幾十萬大軍,間接咁導致隋朝衰亡。
高句麗嘅歷史文化已經成為朝鮮半島傳統文化嘅重要部分。1980年代開始,中韓高句麗爭議浮出水面,由於高句麗係源於中國境內,之後先至擴展到朝鮮半島,佢嘅國土喺而家嘅中國東北地區嘅南部、朝鮮大部份地區同埋韓國嘅北部。上述三國都認為高句麗自始至終都係自己本國嘅原始民族或者地方政權。另外日本學者嘅騎馬民族征服王朝說亦都認為高句麗、扶餘可能係日本民族嘅起源。