科學
人類嘅文化領域之一,亦係個可反覆檢驗嘅知識體系 / From Wikipedia, the free encyclopedia
科學(粵拼:fo1 hok6;日文:科学/かがく kagaku;英文:science)係一套靠實證嚟尋求同累積知識嘅方法,建基於經驗主義:經驗主義係一種有關知識本質嘅觀點,主張知識主要或者完全淨係嚟自求知者能夠感知得到嘅嘢;科學家—專業做科學嘅人—會[1][2]
- 諗一啲客觀噉驗證得到嘅理論同假說出嚟,嘗試用呢啲理論同假說解釋宇宙嘅一啲現象;
- 跟住用實驗或者觀察等嘅方法攞數據,睇吓佢哋嘅理論同假說所作出嘅預測係咪合符數據講嘅嘢;
- 同數據唔夾嘅理論同假說會俾科學家淘汰或者改;
搞科學嘅人會係噉重覆上述嘅過程,直至搵到一啲完美噉符合嗮實驗同觀察數據嘅理論為止[3][4]。
喺現代嘅科學界,科學會按「研究嘅對象係乜」分做唔同領域:物理學研究宇宙嘅基本定律;化學研究物質;生物學研究生命;天文學研究天體;神經科學研究唔同物種嘅神經系統;心理學同動物行為學研究動物-包括人類-嘅行為;而各門嘅社會科學就研究社會嘅各種現象[5];响呢啲大類之下仲有得再細分,例如係專門研究生命嘅生物學噉,就可以按「研究嘅係邊啲生命」再細分做植物學同動物學等嘅子領域;除此之外,廣義上嘅科學仲可以包埋所謂嘅應用科學-即係嗰啲將科學知識攞去做應用嘅領域,例如係工程學(會用物理學知識設計機械同建築物)同醫學(會用生物學上對細菌嘅研究幫手醫病)呀噉。而無論係邊個領域都好,搞科學嘅人都會秉持經驗主義嘅精神,堅持知識一定要建基於客觀同實證先得[6][7]。
科學呢家嘢歷史好悠久,有得追溯到去公元前嘅古希臘時期咁久遠:古希臘嗰時啲哲學家成日喺度傾同諗點樣先至可以得到知識,開始度咗啲橋出嚟,例如佢哋有討論過實證可以點樣幫人得到知識[8];由嗰時開始,科學就有一路噉發展,古羅馬、古印度、中世紀嘅歐洲、中世嘅伊斯蘭世界同華夏(尤其係趙宋皇朝)、文藝復興嘅歐洲、同埋 17 至 18 世紀起嘅歐美同日本等地都有重大嘅科學進展。到咗廿一世紀初,科學經已係一門龐大嘅行業,每年世界各國都投資大量嘅資源去搞科研,而科學家亦都成為咗一份有返咁上下地位嘅工[9][10]。