機械
From Wikipedia, the free encyclopedia
舉個例子說明,好似係一個電摩打噉,個摩打會由電嗰度攞功率(input),跟住佢內部嘅有一啲特殊設計嘅部件(機制),令到佢每逢收到電能量,就會某啲部位旋轉(output),而呢個旋轉嘅部位如果(例如)駁落去個車轆嗰度,就可以用嚟驅動一架車(用途)。再廣義上啲噉睇嘅話,機械呢隻詞唔只包呢啲力學結構,仲可以包埋一啲運作嗰時主要產生、轉變或者運用機械能以外嘅能量做嘢嘅結構,例如電腦噉,就係一啲以非力學方式做運算嘅機械[3][4]。
機械可以好簡單,又可以好複雜:六大簡單機械包括咗六款最基礎嘅機械,例如係槓桿同輪軸等,呢啲機械雖然簡單,但就能夠明顯噉令人用更少嘅力做更多嘅嘢;另一方面,廿一世紀嘅機械可以複雜得好交關,例如汽車、船、飛機、家用電器同埋係工廠嘅機械呀噉,呢啲機械有好多組成部份,有啲甚至會內置埋感應器同電腦,識監察自己做緊嘅工作係咪順利進行緊,或者做一啲好繁複-人手做唔嚟-嘅運算。呢啲各式各樣嘅機械喺各種行業當中都扮演咗不可或缺嘅角色[5][6]。