巴黎
法國首都 / From Wikipedia, the free encyclopedia
巴黎(粵拼:baa1 lai4;法文:Paris,法文讀音:[pa.ʁi] ( 聽)),人稱花都(faa1 dou1),係法國嘅首都,喺法國北部塞納河岸邊,係法蘭西島地區嘅中心。喺2023年,巴黎市區裏面嘅人口估計有210萬以上[1],而巴黎大都會區人口就有超過1,085萬[2],係歐洲人口最多嘅地區之一[3]。
巴黎喺陸路同河運嘅交叉點使佢喺10世紀嗰陣已經係法國主要城市之一,有好多皇宮,有錢嘅修道院,重有一間大教堂添;喺12世紀嗰陣巴黎已經係歐洲學術同埋藝術嘅主要中心之一。而家,巴黎喺政治、時裝、商業、藝術同埋科學都好有影響力。佢係洲際運輸嘅重要樞杻之一,亦都有大學、體育盛事、歌劇公司同埋世界知名嘅博物館 [4][5],2022年遊客有超過4,400萬 [6]。
巴黎地區係法國經濟活動最前端嘅中心。喺2019年本地生產總值有7,390億歐元(7,430億美元)[7],係全歐洲GDP最高嘅地區。勒地方士係歐洲最大嘅商業中心[8],超過一半嘅法國主要公司同埋34間《財富》雜誌世界500強企業嘅總部都喺嗰度[9]。巴黎亦都係好多國際機構嘅總部,例如聯合國教科文組織、經濟合作及發展組織、國際總商會、重有非正式嘅巴黎會。巴黎被認為係世界四大國際都會之一[10]。