Pandemia de COVID-19
From Wikipedia, the free encyclopedia
La pandemia de COVID-19 ła ze na epidemia difondesta a liveło mondiałe in corsa, denomenada "małatia da novo coronavirus", popołarmente conosesta co ła sigla de COVID-19.
Sta voze o sesion ła parla de avegniminti drio córar o de ràpida atuałità. |
I primi cazi conosesti i ghea coinvolzesto prinsipalmente lavoratori del marcà ùmido de Wuhan, in Cina, inte el cuało i vegneva vendesti pesi e altri animałi, anca vivi. Inte łe prime stimane de zenaro del 2020 i siensiai i ghea individuà in sti sojeti strane polmoniti cauzae da un novo coronavirus, dezignà SARS-CoV-2 (sìndrome respiratòria acuta grave da coronavirus 2), rezultà èsare simiłare almanco al 70% de ła so secuensa zènega a cueła del SARS-CoV[1][2][3][4], difondesta co l'epidemia de SARS del 2002-2004. A ła fin del meze de zenaro del 2020 no łe zera oncora stae ben determenae łe caraterìsteghe del virus, si-bè el fuse sta acertà el so èsar bon de trasmétarse da persona a persona, e łe permaneva incertese su łe juste magnere de trasmision e su ła patozenesità (l'èsar bon de far dani)[5]. La małatia asociada ła ze sta reconosesta col nome de COVID-19[6].
La prima segnałasion atribuìbiłe al novo virus ła zera avegnesta inte el 31 de disenbre del 2019[7], ma za l'8 de disenbre i ghe zera stai i primi pasienti co małatia sintomàtega[8]. El 1º de zenaro del 2020 łe autorità łe ghea decidesto ła saraura del marcà e l'izołamento de chi che portava i segni e sìntomi de l'infesion[9]. El primo deceso confermà el riva al 9 de zenaro del 2020[10]. Al 28 de zenaro del 2020 se ghea i zera stai rezistrai pì de 4 600 cazi de contajo confermai in racuanti Paezi del mondo e 106 decesi mentre inte el 15 de febraro sti dati i se ghea za erlevà a 49 053 cazi e 1 381 decesi. Partindo dal 23 de zenaro del 2020, Wuhan ła ze sta ponesta in cuarantena co ła sospension de tuti i trasporti pùbleghi in entrada e in sbandono da ła sità[11], mezure che el dì sevente łe se zera stae estendeste a łe sità arente de Huanggang, Ezhou, Chibi, Jingzhou e Zhijiang[12]. Altre nove limitasion e controłi i ze stai adotai in racuante zone del mondo.
I małai i acuza sìntomi simiłari a l'influensa cofà dermatiti, freve, tose seca, fadiga, dispnea. Inte i cazi pì gravi, de frecuente catai in sojeti za gravai da antesedenti patołozie, se desviłupa polmonite, insufisensa respiratòria acuta finmente rivar anca al deceso. I pasienti i prezenta anca leucopenia e linfocitopenia. Da ła metà de zenaro del 2020 el ze sta fato dispunìbiłe un test par diagnostegar l'infesion da SARS-CoV-2, e poco dopo ła ze partia ła reserca e sperimentasion par cure e vacini spesìfeghi. Le guarizon łe ze spontànee e i tratamenti i ze prinsipalmente volti a zestir i sìntomi e a suportar łe funsion vitałi anca se i ze stai testai racuanti fàrmaghi antivirałi za doparai par contrastar altre infesion.
Na granda risposta, sia in Cina sia a liveło globałe, ła gaveva seguio un cresimento dei cazi inte ła metà de zenaro del 2020, portando restrision de viajo, cuarantene e lìmiti orari, intrà i cuałi i se połe vegner recordai: ła cuarantena de ła nave da crozera Diamond Princess inte łe àcue japonezi; el lìmite oràrio de pì de 780 milioni de persone in Cina e un lìmite oràrio vołontàrio a Taegu, in Corea del Sud[13][14][15]. L'epidemia ła ze sta declarada un'emerzensa sanitària pùblega de intarese internasionałe (PHEIC) da l'Organizasion mondiałe de ła sanità (OMS) inte el 30 de zenaro[16][17]. Aeroporti e stasion feroviàrie łe ga fazesto controłi de ła tenperatura corpòrea, libarà declarasion sanitàrie e publegà segnałi de informasion inte el tentativo de identìfegare i vetori del virus[18]. Un serto nùmaro de Paezi i ga emetesto avertense contro i viaji verso Wuhan, Hubei o ła Cina in zenerałe[19][20]. Un altro consejo el ze sta che i viajadori retornanti da determenae rejon, in partegołar Cina, Iran, Vèneto, Lonbardia e Nord Itàlia, łe se ìzołe inte na cuarantena fidusària[21][22].
Le consevense pì grande de l'epidemia łe ze stae ła preocupasion su l'instabiłità econòmega. La crize pułìtega ła ga includesto anca el licensiamento de vari cai locałi del Partio Comunista Cineze par ła so scarsa asion inte el s-ciopar de l'epidemia[23]. In vari Paezi i ze stai segnałai epizodi de xenofobia e rasismo contro persone de orìzene cineze e de l'Àzia orientałe[24][25][26][27], co vari epizodi de viołensa fìzega e verbałe. La difuzion de dezinformasion e fake news sul virus, prinsipalmente online, ła ze sta descrivesta da l'OMS cofà na "infodemia"[28].