Listahan ng mga aktibong bulkan sa Pilipinas
From Wikipedia, the free encyclopedia
Sa ibaba ay ang listahan ng mga aktibong bulkan sa Pilipinas, na, batay sa pagpapakahulugan ng Surian ng Pilipinas sa Bulkanolohiya at Sismolohiya (PHIVOLCS sa Ingles), ay anumang bulkan na pumutok sa loob ng nakalipas na 600 taon, may ulat ng pagputok na naidokumento ng tao, o kaya ay pumutok sa nakalipas na 10,000 taon (epokang Holoseno).[1]
Sa listahan ng PHIVOLCS, mayroong 24 aktibong bulkan sa Pilipinas, 21 sa ito ay may mga ulat ng pagputok sa kasaysayan. Ang natitirang tatlo ay walang nakasulat na rekord ngunit natitiyak na aktibo batay sa resulta ng radiocarbon dating ng mga deposito ng uson (pyroclastic material): ang Cabalian (na huling pumutok sa pagitan ng 165-105 BCE)[2], ang Leonard Kniaseff (na huling pumutok 1,800-6,000 taon na ang nakalilipas)[3], at Isarog (na huling pumutok sa pagitan ng 3500-2374 BCE ± 87).[4]
Samantala, may hiwalay na listahang minimintine ang Global Volcanism Program (GVP) ng Suriang Smithsonian.[5] Nililista ng GVP ang mga bulkan bilang bahagi ng kanilang listahan kung ang bulkan ay may malakas na ebidensya pa rin ng kasalukuyang bulkanikong aktibidad, tulad ng pagkakaroon ng mga pagsingaw, mainit na bukal, kumukulong putik, at iba pa.[6]