Liberalissem
From Wikipedia, the free encyclopedia
Il liberalissem (latin liber ‹liber›; liberalis ‹liberal, che concerna la libertad›) è ina da las posiziuns fundamentalas da la filosofia politica ed in moviment istoric ed actual che vul stgaffir in urden politic, economic e social da tempra liberala. Las ragischs dal liberalissem èn da chattar en la Revoluziun englaisa dal 17avel tschientaner.[1] Da moviments da burgais liberals èn sa sviluppads en blers pajais ils emprims sistems democratics.
La directiva dal liberalissem furma la libertad da l’individi, surtut envers la pussanza statala. Il moviment sa drizza en quest senn cunter servilitad envers il stadi, collectivissem, despotissem e maldiever da la pussanza. Sper il conservatissem ed il socialissem vala il liberalissem sco ina da las trais grondas ideologias resp. concepziuns dal mund politicas ch’èn sa furmadas en il 18avel e 19avel tschientaner en l’Europa.