Ballabasket
From Wikipedia, the free encyclopedia
Ballabasket è in sport da balla che vegn per ordinari giugà en halla e tar il qual duas squadras emprovan da bittar la balla en il chanaster da l’adversari. Ils chanasters sa chattan en in’autezza da 3,05 meters da la vart graschla dal champ. Ina squadra consista da tschintg giugaders da champ e fin a set giugaders da reserva che pon vegnir stgamiads tenor giavisch. Mintga tutgada en il chanaster or dal gieu quinta tut tenor la distanza dus u trais puncts. In culp liber tutgà quinta in punct. I gudogna la squadra cun il pli aut dumber da puncts.
Il ballabasket ha il medi e pedagog canadais James Naismith inventà il 1891 sco sport da halla. Dapi il 1936 sa tracti d’ina disciplina olimpica. Oz è il ballabasket derasà en tut il mund ed è surtut en ils Stadis Unids, en China ed en l’Europa dal Sid in dals sports ils pli populars. Mintga quatter onns ha lieu in campiunadi mundial da ballabasket che vegn realisà da la Federaziun internaziunala da ballabasket FIBA.
Tenor indicaziuns da la FIBA giogan en tut il mund radund 450 milliuns umans ballabasket.[1] Ils atlets da ballabasket ch’han il pli grond success tutgan a nivel internaziunal tar ils sportists da professiun cun las pli autas pajas insumma.