Little Foot
From Wikipedia, the free encyclopedia
Liitle Foot o Pè Petit en occitan, ei eth nom d'un fossil ominid descorbert en ues circonstancies excepcionaus en 1994 en Strekfontein, en Africa del Sud. Aguest fossil ei era esqueleta der australopithecus mès conegut sancer jamès descorbert enqui aué. Abans qu'era istòria geologica deth lòc estosse estimada, era sua edat siguec objecte d'estimacions contradictories e anava des 2,2 as 2,4 milions d'annades. Un estudi publicat en 2015 confirma qu'a ua edat de 3,67 milions d'annades e qu'ei mès ancian que Lucy.
Es prumèrs troçi d'esqueleta de Little Food sigueren identificadi peth paleontològ Ronald J. Clarke en 1994 quan classave fossils de bueus descorberts abans en Sterkfontein. Aguesti troçi sigueren trapats ena Cauma de Silberberg, un gran horat carstic d'Sterkfontein. R.J. Clarke descorbiguèc alavetz quate uassi d'un pè quèrre qu'apertenhien a un ominid e quasi de segur a un madeish individú.
Sigueren descrits e classadi laguens deth genre Australopithecus e aperadi damb eth nom Stw573 [1]. Coma qu'es uassi hèien ua plan petita mesura sigueren tanben aperadi coma Pè Petit. En 1997, R. J. Clarke descorbiguèc d'autes uassi deth pè deth madeish individú en es ancianes amassades d'uassi que ja s'avien hèt abans. Trapec un troç distal de tibia dreta qu'avie sigut desseparada dera tibia. Atau demandèc a sòns ajudanti, Stephen Motsumi e Nkwane Molefe d'anar entàra cauma de Silberberg entà sajar de trapar auti troçi dera tibia. Solament en dus jorns sigueren trapadi, damb mès uassi.
R.J.Clarke cerquèc mès pauc a pauc e era sua equipa podèc trapar un cran sancer e d'auti troçi de uassi. Açò hèc descorbir ua esquelata gaireben sancera damb divèrsi uassi tanben sancers: un avant-braç era pelvis, costelhes, vertèbres, umer e tanben troçi des jambes e des pès. Aguest hèt cridèc era atencion de toti es media de tot eth mond en 1998 [2].