നദിയ മൊയ്തു
ഇന്ത്യൻ ചലചിത്ര അഭിനേത്രി / From Wikipedia, the free encyclopedia
മലയാളത്തിലും തമിഴിലും പ്രധാനമായും അഭിനയിച്ചിട്ടുള്ള ഒരു ഇന്ത്യൻ നടിയാണ് നദിയ മൊയ്തു (ജനനം: സറീന മൊയ്തു, 24 October 1966). ഏതാനും തെലുങ്ക് ചിത്രങ്ങളിലും അഭിനയിച്ചിട്ടുള്ള നദിയ മലയാള ചലച്ചിത്രമായ നോക്കെത്താ ദൂരത്തു കണ്ണും നട്ട് (1984) എന്ന ചിത്രത്തിലൂടെ മോഹൻലാലിനും പത്മിനിക്കും ഒപ്പം അഭിനയിച്ചുകൊണ്ടാണ് ചലച്ചിത്ര രംഗത്ത് അരങ്ങേറ്റം കുറിച്ചത്. ഈ ചിത്രത്തിലെ അഭിനയം മികച്ച നടിക്കുള്ള ഫിലിംഫെയർ അവാർഡ് (മലയാളം) നേടിക്കൊടുത്തു.[2] 1985 ൽ ഈ ചിത്രം പൂവേ പൂചൂടവാ എന്ന പേരിൽ തമിഴിൽ പുനർഃനിർമ്മിച്ചതോടെ തമിഴിലും അരങ്ങേറ്റം കുറിച്ചു.[3] 1988-ൽ വിവാഹശേഷം, അമേരിക്കയിലും പിന്നീട് യു.കെ.യിലുമായി ഭർത്താവ് ഷിരീഷ് ഗോഡ്ബോലെയ്ക്കും രണ്ട് പെൺമക്കൾക്കുമൊപ്പം ജീവിതം നയിച്ച അവർ 2007-ൽ ഇന്ത്യയിലേക്ക് മടങ്ങി.
നദിയാ മൊയ്തു ഗോഡ്ബോലെ | |
---|---|
ജനനം | സറീന മൊയ്തു (1966-10-24) 24 ഒക്ടോബർ 1966 (57 വയസ്സ്)[1] |
മറ്റ് പേരുകൾ | നടി |
തൊഴിൽ | നടി |
സജീവ കാലം | 1984–1989; 1994; 2004–present |
ജീവിതപങ്കാളി(കൾ) | ശിരീഷ് ഗോഡ്ബോലെ (m.1988–present) |
കുട്ടികൾ | സനം (b.1996) ജന (b.2001) |
പുരസ്കാരങ്ങൾ | Best Actress Filmfare Award (Nokketha Doorathu Kannum Nattu) Best Actress Critics Award |
എം. കുമരൻ s/o മഹാലക്ഷ്മി എന്ന തമിഴ് ചിത്രത്തിലൂടെ അഭിനയരംഗത്തേയ്ക്കു തിരിച്ചെത്തുകയും ജയം രവിയുടെ അമ്മയുടെ വേഷം അവതരിപ്പിച്ചതിന്റെപേരിൽ നിരൂപക പ്രശംസയും ലഭിച്ചു.[4] 2008 ൽ അവർ അരോക്യ മിൽക്ക്, തംഗമൈൽ ജ്വല്ലറി എന്നിവയുടെ ബ്രാൻഡ് അംബാസഡറായി കരാർ ഒപ്പുവച്ചു. ജയ ടിവിയിൽ നടി ഖുഷ്ബുവിന് പകരമായി ജാക്ക്പോട്ട് എന്ന പ്രശസ്തമായ ടെലിവിഷൻ ഷോ നാദിയ അവതരിപ്പിക്കുന്നു.
2013 ൽ തെലുങ്കു ചിത്രമായ മിർച്ചിയിലെ നടൻ പ്രഭാസിന്റെ അമ്മയെന്ന നിലയിലും അട്ടാരിന്റിക്കി ദാരെഡിയിൽ ധാർഷ്ട്യക്കാരിയായി അമ്മായിയുടെ വേഷത്തിലും അഭിനയിച്ച അവർക്ക് രണ്ട് വേഷങ്ങൾക്കും നിരൂപക പ്രശംസ ലഭിച്ചിരുന്നു. 2013 ൽ അട്ടാരിന്റികി ദാരെഡിയിലെ അഭിനയത്തിന് മികച്ച സഹനടിക്കുള്ള നന്ദി അവാർഡ് ലഭിച്ചു.[5][6]