Uni Soviet
From Wikipedia, the free encyclopedia
Uni Soviet (bahaso Rusia, Sovyétskiĭ Soyúz) atau Uni Republik Sosialis Soviet, disingkek URSS (bahaso Rusia, Сою́з Сове́тских Социалисти́ческих Респу́блик, Soyúz Sovyétskikh Sotsialistícheskikh Respúblik; disingkek СССР dalam alfabet Kiril, SSSR dalam alfabet Latin), adolah negara sosialis nan pernah ado antaro taun 1922–1991 di Eurasia.
|
Uni Soviet manganuik sistim politik ciek partai nan dipagang dek Partai Komunis hinggo taun 1990.[4] Walaupun Uni Soviet sabananyo iolah suatu kesatuan politik dari babarapo republik Soviet jo ibu kota di Moskow, nyatonyo Uni Soviet manjelma manjadi nagori nan pamarentahannyo sangaik tapusek jo manarapkan sistem ekonomi tarencana.
Revolusi Februari nan bagolak di Rusia pado taun 1917 manyababkan runtuahnyo Kekaisaran Rusia. Panaruihnyo, Pamarentahan Samantaro Rusia, hanyo batahan hinggo diguliangan malalui Revolusi Oktober pado taun nan samo. Sasudah kaum Bolshevik manang dalam Parang Sipil Rusia pascarevolusi, Uni Soviet didirikan pado tanggal 30 Desember 1922 jo anggotanyo RSFS Rusia, RSFS Transkaukasia, RSS Ukraina, dan RSS Byelorusia
Pasca-kamatian pamimpin Soviet nan partamo, Vladimir Lenin, pado taun 1924, Josef Stalin manjadi panggantinyo sasudah mamanangan parabuikan kakuasaan[5] jo mamimpin nagori tasabuik malewati proses industrialisasi gadang jo sistim ekonomi tarencana jo panindasan politik.[5][6] Dalam suasana Parang Dunia II, pado bulan Juni 1941, Nazi Jerman jo sakutunyo manyarang Uni Soviet malalui Operasi Barbarossa walaupun sabalumnyo kaduo nagori alah manandatangani Pakta Molotov-Ribbentrop nan barisi pajanjian untuak indak saling manyerang. Sasudah ampek taun baporang nan sabana gadang, Uni Soviet muncua sabagai salah ciek dari duo nagori adidaya pamanang parang salain Amerika Serikat. Pado akhirnyo, Uni Soviet mangalami kakalahan dalam hal ekonomi sarato politik dalam jo lua negeri.[7][8] Pado akhir taun 1980-an, pamimpin Soviet nan tarakhir, Mikhail Gorbachev, mancubo marestrukturisasi negaran nan dipimpinnyo malalui kabijakan glasnost jo perestroika, tapi justru mambuek papacahan di Uni Soviet nan akhirnyo sacaro resmi bubar pado tanggal 26 Desember 1991 sasudah gagalnyo pacuboan kudeta pado bulan Agustus sabalumnyo.[9] Hak jo kewajiban negara iko kamudian dilanjuikan dek Federasi Rusia.[10]
Pado masonyo, Uni Soviet mamiliki tigo parwakilan di Parsarikatan Bangsa-Bangsa (PBB), yaitu Uni Soviet, Ukraina, jo Byelorusia