Madame de Pompadour
From Wikipedia, the free encyclopedia
Jeanne-Antoinette Poisson, markgreifynja af Pompadour (29. desember 1721 – 15. apríl 1764), yfirleitt kölluð Madame de Pompadour, var frönsk aðalskona og helsta frilla Loðvíks 15. Frakklandskonungs frá 1745 til 1751. Pompadour naut mikilla áhrifa sem ráðgjafi konungsins og tókst að tryggja sjálfri sér og ættingjum sínum fjölmarga aðalstitla á árum sínum í þjónustu hans. Í um 19 ár stjórnaði hún lista- og samkvæmislífi Frakklands og naut auk þess verulegra pólitískra valda.[1] Hún eignaðist þó fyrir vikið marga óvini.
Jeanne-Antoinette Poisson, markgreifynja af Pompadour | |
---|---|
Fædd | 29. desember 1721 |
Dáin | 15. apríl 1764 (42 ára) Versölum, Frakklandi |
Störf | Aðalskona, hjákona |
Trú | Kaþólsk |
Maki | Charles-Guillaume Lenormant d'Étioles |
Börn | Charles Guillaume Louis Le Normant d'Étiolles og Alexandrine Le Normant d'Étiolles |
Foreldrar | François Poisson & Madeleine de La Motte |
Undirskrift | |
Gagnrýnendur Pompadour útmáluðu hana sem spillandi áhrifavald í hirð konungsins en sagnfræðingar hafa litið hana jákvæðari augum vegna stuðnings hennar við franska list og þjóðarstolt.[2] Listfræðingurinn Melissa Hyde hefur fært rök fyrir því að óttinn og gagnrýnin í garð Pompadour hafi fyrst og fremst stafað af andúð á því að kona úr millistéttinni nyti svo mikilla valda.[3]