Bítlarnir
Ensk rokkhljómsveit (1960-1970) / From Wikipedia, the free encyclopedia
Bítlarnir (enska: The Beatles) voru ensk rokkhljómsveit sem var stofnuð árið 1960 í borginni Liverpool. Meðlimir hennar voru lengst af John Lennon (gítar/söngur), Paul McCartney (bassagítar/söngur), George Harrison (gítar), og Ringo Starr (trommur). Hljómsveitin er í hópi þeirra vinsælustu og áhrifamestu sem uppi hafa verið.[1] Sveitin á rætur að rekja til hljómsveitarinnar The Quarrymen, sem John Lennon stofnaði árið 1956.
The Beatles | |
---|---|
Upplýsingar | |
Uppruni | Liverpool, England |
Ár | 1960–1970 |
Stefnur | |
Útgefandi | |
Fyrri meðlimir | |
Vefsíða | thebeatles |
Bítlarnir eru söluhæsta hljómsveit allra tíma, með áætlaða 600 milljón eintaka sölu á heimsvísu.[2][3] Þeir eru vinsælasta hljómsveit sögunnar miðað við bandaríska Billboard-lista[4] og eiga metið yfir flestar plötur í fyrsta sæti Breska hljómplötulistans (15), flest lög í fyrsta sæti á Billboard Hot 100-listanum (20), og flestar smáskífur seldar í Bretlandi (21,9 milljónir). Hljómsveitin vann til fjölda verðlauna, þar á meðal sjö Grammýverðlaun, fjögur Brit-verðlaun, Óskarsverðlaun (fyrir bestu frumsömdu tónlist í heimildamyndinni Let It Be) og fimmtán Ivor Novello-verðlaun. Þeir fengu inngöngu í Frægðarhöll rokksins árið 1988 og hver og einn meðlimur hljómsveitarinnar fékk þar inngöngu á milli 1994 og 2015. Árin 2004 og 2011 voru þeir á toppi lista Rolling Stone yfir 100 bestu tónlistarmenn allra tíma. Tímaritið Time setti þá á lista yfir 100 mikilvægustu einstaklinga 20. aldar.