Lista de reis suevos
Os reis da Galiza sueva / From Wikipedia, the free encyclopedia
A primeira persoa en asumir o título de rei en Galicia foi o monarca suevo Hermerico, quen conseguiu do Imperio Romano de Occidente no ano 409 o goberno da provincia romana de Gallaecia, facendo dela o seu novo reino. A súa dinastía instaura primeiramente un reino suevo en canto que a monarquía e a elite detentadora do poder eran suevas. Porén, durante o século V d. C., o entendemento coa poboación galaica e a adopción do catolicismo romano consolidan finalmente un reino de Galicia. Así o pon de relevo nesa centuria o papa León I ao denominalo Galliciae Regno[1], e o mesmo fai o erudito franco Gregorio de Tours xa a finais do século VI, quen o chama Galliciense Regnum[2].
Na obra de Gregorio de Tours preséntase a Carriarico[3], Miro[4], Eurico[5] e Andeca[6] como monarcas galegos, e do mesmo xeito actúa a crónica de Fredegario (ca. 650) con Miro[7], as actas do concilio de Lugo (569) con Teodomiro[8][9], e o bispo Xoán Biclarense († ca. 621) quen sinala a Andeca como monarca do reino suevo de Galicia[10].