Wei (estrella)
From Wikipedia, the free encyclopedia
Wei (ε Scorpii / ε Sco / 26 Scorpii / HD 151680)[7] ye la cuarta estrella más brillosa de la constelación del Escorpión, siendo la so magnitú aparente +2,29. Ye superada en rellumu por Antares (α Scorpii), Shaula (λ Scorpii) y Sargas (θ Scorpii). El nome de Wěi, «la cola», orixinariamente yera'l nome d'una constelación china qu'incluyía a μ1, μ2, ζ1, ζ2, η, θ, ι, κ, υ y λ Scorpii.[8]
Distante 65 años años lluz del Sistema Solar, Wei tópase más cerca que munches otres estrelles de la constelación acomuñaes ente sigo. Ye una xigante naranxa de tipu espectral K1III[7] y 4400 K de temperatura efectivo, que la so lluminosidá (incluyida la radiación emitida nel infrarroxu) ye 72 vegaes mayor que la del Sol. Con un radiu ente 13 y 15 vegaes mayor que'l radiu solar,[9] el so tamañu ye discretu comparáu al d'otres estrelles xigantes como Aldebarán (α Tauri), que'l so radiu ye 3 vegaes más grande.
Con una incierta masa ente 1 y 1,5 mases solares, la edá de Wei puede ser comparable a la del Sol. Anque nun se conoz con certidume'l so estáu evolutivu, la opción más probable ye que tea aumentando en rellumu con un nucleu inerte d'heliu; sicasí, una pequeña variación reparada nel so rellumu (en redol al 10% del mesmu), suxure que la medría en lluminosidá puede debese a la esistencia d'un nucleu inerte de carbonu y oxíxenu. Tien una metalicidá en redol al 70% de la solar y la so velocidá de rotación proyeutada (1,7 km/s) da como resultáu un periodu de rotación d'hasta 1,3 años.[9]
La velocidá a la que Wei muévese respectu al Sol, 63 km/s, ye trés o cuatro veces mayor que la de les estrelles cercanes del discu galácticu, lo qu'indica que Wei ye una visitante proveniente del discu más antiguu y gruesu que constitúi la transición col halo galácticu.[9]