The Lord of the Rings: The Fellowship of the Ring
película de 2001 dirixida por Peter Jackson / From Wikipedia, the free encyclopedia
The Lord of the Rings: The Fellowship of the Ring ye una película d'aventures y fantasía de 2001 dirixida por Peter Jackson y basada nel La Comunidá del Aniellu primer volume de El señor de los Aniellos, de J. R. R. Tolkien (1954-55).[14][15][16] Ye la primer entrega de la triloxía cinematográfica d'El Señor de los Aniellos, compuesta tamién por Les dos torres y The Return of the King, que de la mesma afaen los otros dos volúmenes de la saga lliteraria de fantasía.
Ambientada na Tierra Media, cunta la historia del Señor Escuru Sauron, que ta buscando'l Aniellu Únicu, que acabó en poder del hobbit Frodo Fardel (Elijah Wood). El destín de la Tierra Media ta en xuegu mientres Frodo y ocho compañeros que formen la Compañía del Aniellu empiecen un llargu y peligrosu viaxe escontra'l Monte del Destín na tierra de Mordor, que ye l'únicu llugar nel que l'aniellu puede ser destruyíu.
La película estrenó'l 10 d'avientu de 2001 y recibió allabancies xenerales tantu de los críticos de cine como del públicu, qu'aína la consideraron un finxu de la cinematografía polo xeneral y del xéneru fantásticu en particular. Dende entós suel incluyise nos llistaos de les meyores películes de fantasía de la historia del cine. La película foi un ésitu de recaldación con 871 millones de dólares de ganancies a nivel mundial, colo que se convirtió na segunda película más taquillera d'esi añu, solo por detrás de Harry Potter y la piedra filosofal.
La Comunidá del Aniellu foi nomada a trelce premiu Óscar nel so 74ª edición en 2002, ente estos meyor película, meyor direutor y meyor actor de repartu (Ian McKellen), y ganó los de meyor fotografía, meyor maquillaxe, meyor banda sonora y meyores efeutos visuales. Coles mesmes, foi gallardoniada con cuatro premios BAFTA del cine británicu, incluyíos meyor película y meyor direutor. Nel añu 2007 la película foi incluyida por votación popular nel puestu 50 de la llista de les 100 meyores películes estauxunidenses de la historia ellaborada pol American Film Institute, amás de ser incluyida como la segunda meyor nel xéneru fantásticu. Nel llistáu de les 500 meyores películes qu'arrexuntó en 2008 la revista Empire, La Comunidá del Aniellu foi incluyida nel númberu 24.[17]