Ramón Barros Luco
From Wikipedia, the free encyclopedia
Ramón Barros Luco (9 de xunu de 1835, Santiagu – 20 de setiembre de 1919, Santiagu) foi un abogáu y políticu chilenu, presidente de la República ente 1910 y 1915.
Desenvolviendo una llarga trayeutoria política como ministru y parllamentariu, Barros Luco foi escoyíu presidente en 1910 col sofitu de tolos partíos. Mientres el so gobiernu acentuó la rotativa ministerial, llegando a tener 15 gabinetes. Intentó combatir los escesos del réxime parllamentariu, modificando'l sistema de clausura del alderique y estableciendo lleis contra'l fraude eleutoral.
Definió la neutralidá de Chile frente a la Primer Guerra Mundial y tomó midíes contra les dificultaes económiques que significaba'l zarru de los mercaos europeos. Roblóse'l Pactu ABC con Arxentina y Brasil como manera de compensar la influencia estauxunidense na rexón. Mientres el so mandatu realizaron obres públiques de relevancia, destacando'l ferrocarril Arica-La Paz y l'actual edificiu de la Biblioteca Nacional de Chile.
Escépticu no que fai a l'aición política y de calter bonachón, la so figura histórica ye recordada na memoria coleutiva poles incontables anécdotes atribuyíes a la so persona.[2]