Mitoloxía nórdica
From Wikipedia, the free encyclopedia
Los términos mitoloxía nórdica, mitoloxía xermánica y mitoloxía escandinava entienden tou lo relativo a la relixón, creencies y lleendes de los pueblos escandinavos xermanos, incluyíos aquellos que s'asitiaron n'Islandia, Britania, Galia y Hispania,[ensin referencies] onde s'axuntaron les fontes escrites de la mitoloxía nórdica. Ye la versión meyor caltenida de l'antigua mitoloxía xermana, común a tolos pueblos xermanos. La mitoloxía xermana, de la mesma, evolucionó d'una mitoloxía indoeuropea que yera más temprana.
La mitoloxía nórdica yera una coleición de creencies y histories compartíes polos pueblos xermanos septentrionales. Ye importante señalar qu'esta mitoloxía nun yera compartida polos pueblos nórdicos d'etnia urálica (fineses, estonios y lapones) nin báltica (lituanos y letones), quien teníen una propia, anque asemeyada (n'especial los bálticos yá que tamién son una caña de pueblos indoeuropeos). Nun yera una relixón revelada, pos nun había una verdá apurrida polos divinos a los mortales (a pesar que tien rellatos de persones normales aprendiendo les histories de los dioses d'una visita de, o a, ellos), y nun tenía un llibru sagráu. Esta mitoloxía yera tresmitida oralmente en forma d'una llarga y regular poesía. Dicha tresmisión siguió mientres la dómina viquinga, y la nuesa conocencia sobre ella ta basáu principalmente nes Eddes y otros testos medievales escritos mientres o dempués de la cristianización.
Nel folclor escandinavu, estes creencies duraron enforma tiempu, y en delles árees rurales delles tradiciones fueron calteníes hasta güei. Otres fueron apocayá alicaes o reinventaes como'l neopaganismu xermanu. La mitoloxía tamién permaneció como inspiración na lliteratura según en producciones escéniques o películes.