Guéiser
From Wikipedia, the free encyclopedia
Un guéiser[1] (islandés Geysir, nome d'una terma en Haukadalur, Islandia, del verbu geysa, 'emanar')[2][3] ye un tipu especial de fonte termal qu'emite dacuando una columna d'agua caliente y vapor al aire.
El famosu Geysir d'Islandia ye'l que dio'l nome común de guéiser a estes fontes termales. Dende 2006, el Geysir ta agordonáu por motivos de seguridá. Otru famosu guéiser que s'atopa a 25 m, el Strokkur, puede vese espulsando remexos d'agua caliente cada 14 minutos. Nel parque de Haukadalur atópense un total de seis guéiseres.
La formación de guéiseres rique una hidrogeoloxía favorable qu'esiste solo en delles partes del planeta, polo que son un fenómenu bastante estrañu. Esisten cerca de 1000 alredor del planeta, de los cualos casi la metá tán allugaos nel parque nacional de Yellowstone, Estaos Xuníos.[4]
L'actividá d'erupción de los guéiseres puede camudar o cesar por cuenta de la deposición de minerales dientro de los conductos —tuberíes— internos del guéiser, al intercambiar funciones con fontes termales cercanes, pola influencia de terremotos, o por causa de la intervención humana.[5]