Los bombardeos atómicos sobre Hiroshima y Nagasaki (n'inglés, atomic bombings of Hiroshima and Nagasaki; en xaponés, 日本への原子爆弾投下, llit., «cayida de bombes atómiques en Xapón») fueron ataques nucleares ordenaos por Harry S. Truman, presidente de los Estaos Xuníos, contra l'Imperiu del Xapón. Los ataques efeutuáronse'l 6 y el 9 d'agostu de 1945 respeutivamente, lo que forzó la rindición de Xapón y el fin de la Segunda Guerra Mundial. Dempués de seis meses d'intensu bombardéu d'otres 67 ciudaes, el arma nuclear Little Boy foi soltada sobre Hiroshima el llunes[1] 6 d'agostu de 1945,[2] siguida pola detonación de la bomba Fat Man el xueves 9 d'agostu sobre Nagasaki. 105 000 y 120 000 persones morrieron y 130 000 resultaron mancaes.[3][4][5] Hasta la fecha, estos bombardeos constitúin los únicos ataques nucleares de la hestoria.[6]
Datos rápidos Fecha, Llugar ...
Zarrar
Envalórase qu'escontra finales de 1945, les bombes mataren a 166 000 persones n'Hiroshima y 80 000 en Nagasaki,[7] totalizando unes 246 000 muertes, anque solo la metá finó los díes de los bombardeos. Ente les víctimes, del 15 al 20 % morrieron por mancadures o enfermedaes atribuyíes al envelenamientu por radiación.[8] De magar, dalgunes otres persones finaron de leucemia (231 casos reparaos) y distintos cánceres (334 reparaos) atribuyíos a la esposición y a la radiación lliberada poles bombes.[9] En dambes ciudaes, la gran mayoría de les muertes fueron de civiles.[10][11]
Seis díes dempués de la detonación sobre Nagasaki, el 15 d'agostu, l'Imperiu de Xapón anunció la so rindición incondicional frente a los «Aliaos», faciéndose formal el 2 de setiembre cola firma de l'acta de capitulación. Cola rindición de Xapón, concluyó la Guerra del Pacíficu y por tanto, la Segunda Guerra Mundial. Como consecuencies de la derrota, l'Imperiu nipón foi ocupáu por fuercies aliaes lideraes polos Estaos Xuníos —con contribuciones d'Australia, la India británica, el Reinu Xuníu y Nueva Zelanda— y adoptó los «Tres principios antinucleares», que-y prohibíen tener, fabricar ya introducir armamentu nuclear.[12]