Heidi
From Wikipedia, the free encyclopedia
Die bäide Chinderbüecher Heidis Lehr- und Wanderjahre und Heidi kann brauchen, was es gelernt hat vo dr Schwizer Autorin Johanna Spyri (1827–1901) us de Joor 1880 und 1881 ghööre zu de bekanntiste Chinderbüecher uf dr Wält. Mit iire Heidi-Büecher het d Johanna Spyri e romantischs und idealtüpischs Bild vo dr Schwiz erschaffe, wo au hüte no wit verbräitet isch.
Es isch mööglig, ass sich d Spyri vo dr Gschicht Adelaide – das Mädchen vom Alpengebirge vom dütsche Pedagog und Schriftsteller Hermann Adam von Kamp het lo inspiriere.[1] Die These isch aber umstritte und muess no mee röscherschiert wärde.[2]
In numen e baar Joor noch dr erste Publikazion si d Heidibüecher zum ene Wälterfolg worde. Bis hüte si si in mee as 50 Sprooche übersetzt und e baar Mol verfilmt worde. Wo d Urheeberrächt abglofe si, si immer mee Heidi-Büecher und -Gschichte erschiine, wo aber mit dr Heidi vo dr Spyri vilmol nume wenig z due häi.