Dr Grooss Sprung noch vorne
From Wikipedia, the free encyclopedia
Dr Grooss Sprung noch vorne (chin. 大躍進 / 大跃进, dà yuè jìn) isch dr Naame für e Kampanie in dr Volksrepublik China gsi, wo vo 1958 bis 1961 gange isch. Si het us meerere äinzelne Iniziative bestande und s Ziil isch gsi, ass si dr zwäit Fümfjooresblaan (1958–1962) wurd ersetze und überdräffe. Mit dere Kampanie het mä welle die drei groosse Underschiid zwüsche Land und Stadt, Chopf und Hand, und Industrii und Landwirtschaft usgliiche, dr Ruggstand zu de westlige Industriiländer ufhoole und d Übergangsperiode zum Kommunismus dütlig verchürze.
D Kampanie vom Groosse Sprung het noch em erste Fümfjooresblaan vo 1953 bis 1957 aagfange, hät vo 1958 bis 1963 sölle goo. 1961, wo s klaar gsi isch, ass si gschiiteret isch, het mä sä abbroche.[1][2]
Dr „Grooss Sprung noch vorne“ het noch em Ändi vo dr Hundert-Blueme-Beweegig aagfange und isch in e Zit gfalle, wo die politische Spannige zwüsche China und dr Sowjetunion gwaggse si. Er isch die wääsentligi Ursach für die schweeri Hungersnot gsi, wo vo 1959 bis 1961 z China gherrscht het. Es het in dene Joor zwar au schweeri Überschwemmige und Dürre gee, dr entschäidendi Grund für d Hungersnot isch aber e wirtschaftligs Feelmanidschment gsi. Wäge dr Zwangskollektivierig vo dr Landwirtschaft, dr zuesätzlige Belastig vo de Buure, wo au no an dr Infrastruktur- und bi Industrialisierigsbrojekt het müesse mitschaffe und ere Binnemigrazioon vo dr Landbevölkerig in d Stedt si die landwirtschaftlige Erdrääg vo 1959 bis 1961 gsunke. Gliichzitig het dr Staat d Stüüre stark uufedoo und mit Zwangsmaassnaame duregsetzt. D Zaal vo de Opfer vo dere Hungersnot wird uf 15 bis 45 Millione Mensche gschetzt. Es handlet sich um die grössti Hungerkatastroofe in dr Gschicht vo dr Menschhäit.