Bartholomäusnacht
From Wikipedia, the free encyclopedia
D Bartholomäusnacht (au Bariiser Bluethochzit, franzöösisch Massacre de la Saint-Barthélemy) isch e Massaker an franzöösische Protestante gsi, wo in dr Nacht vom 23. zum 24. August 1572 stattgfunde het. Dr Admiral Gaspard de Coligny und witeri Füerer vo de Hugenotte si uf Befääl vo dr Königinmueter Katharina vo Medici ermordet worde. Si si uf Bariis cho, zum d Hochzit vom protestantische Heinrich vo Navarra (em spöötere Köönig Heinrich IV.) mit dr Dochder vo dr Katharina, dr Margarete vo Valois z fiire. Die Hochzit zwüschen eme Protestant und ere Katholikin hät die bäide Gmäinschafte sölle versööne. In dere Nacht het s non e Pogroom gee, wo Duusigi vo Bariiser Protestante drbii ermordet worde si.
S Massaker isch e zentrals Eräignis vo de Hugenottechrieg. Es isch noch eme erste Mordaaschlaag uf en Admiral Coligny am 22. August 1572 choo, wo nid glunge isch. Noch em Gmetzel in de Stroosse vo Bariis het sich e Wälle vo Gwalt über fast ganz Frankriich usbräitet.[1]
D Bartholomäusnacht isch e zentrals Datum in dr Gschicht vo Frankriich im 16. Joorhundert und dief im kollektive Gedächtnis vo de Franzoose verankeret. Si isch e Motiv, wo hüfig in dr Litratuur und dr bildende Kunst behandlet wird.