道教
From Wikipedia, the free encyclopedia
道教係一個中國傳統宗教,意思即係話「道」嘅教化同說教,通過信奉「道」嘅精神修煉而成仙得道嘅宗教。道教根據早期道家哲學思想中關於道生萬物、氣化宇宙、天人合一嘅世界觀做基礎,發展咗一套關於陰陽互相轉化嘅思想出嚟,成為道教最基礎信仰。
多數認為道教成個體系,由先秦道家開始發展,之後受傳統鬼神崇拜同民間巫術影響,大約喺東漢嗰陣形成基本形態,跟住又吸收咗儒家嘅道德倫理觀、墨家嘅均平思想、陰陽家嘅占卜術數,再經歷唔同朝代思想演變,最後變成一套成熟同完整嘅宗教體系。
道教崇尚自然無為同佢嘅神仙信仰,對中國文化影響深遠,好多道教嘅崇拜活動,都同傳統中國人生活、文化活動有關連。另外,道教服藥煉丹方術同埋養生術,亦演變出中醫中藥嘅學問出嚟。