視覺
From Wikipedia, the free encyclopedia
視知覺係一個多層嘅過程:喺最基本嗰一層,腦要知眼睇到嘅嘢嘅物理特徵;跟住要按睇到嘅嘢嘅呢啲特徵,將眼睇到嘅影像分做各件物件,並且評估環境入面每件物件係乜-例如如果睇到件物件中間有一條垂直、啡啡地噉色嘅幹,而幹上面有好多綠色嘅薄片,嗰件物件好可能係一樖樹;然後再將物件分類-將嗰件物件同表示樹嘅心智表徵連埋一齊[3][4]。呢啲複雜嘅認知過程冚唪唥都屬於視知覺嘅一部份[1]。
認知科學等領域有對視知覺進行詳細嘅研究,而呢啲研究相當有實用價值[5][6]:例如有唔少研究視知覺嘅科學家都會運用眼動追蹤(eye tracking)嘅方法,喺受試者睇視藝作品嗰陣監察住佢哋眼珠嘅郁動,研究幅作品嘅特徵(題材同構圖等)會點樣影響受試者嘅眼珠郁動,而眼珠郁動又會點影響受試者有幾鍾意幅作品-而呢啲研究令到本嚟只係憑經驗同直覺嘅視藝設計原則(指藝術界一柞有關「要點先可以令幅作品受歡迎」嘅諗法)得到科學性嘅證據支撐,所以呢啲研究對廿一世紀嘅藝術設計起咗唔少作用[7]。