衝動 (性格)
From Wikipedia, the free encyclopedia
衝動(粵拼:cung1 dung6;英文:impulsivity,形容詞:impulsive)喺性格心理學上係一種特質(trait)。响廿一世紀初,性格心理學界對「衝動」嘅具體定義仲未有完全一致嘅共識;不過一般嚟講,話一個人衝動係指嗰個人做嘢唔諗後果[1][2],而衝動嘅人成日都會因為佢哋唔諗後果,做出一啲短期內得益但長遠嚟講搞到自己受損嘅行為[3][4]。
舉個例說明,想像家陣有個人俾人引佢吸毒,由佢嘅角度睇嘅話:佢揀吸毒可以為自己帶嚟短期嘅快感,但噉做長遠嚟講會有上癮等嘅重大負面後果;而相對嚟講,如果佢揀唔吸毒就會而家冇得享受快感,但噉做長遠就唔使承受吸毒引起嗰啲重大後果-揀唔吸毒嘅話,第時就會得到更加大嚿嘅快感;即係話喺成個過程裏面,個人要由短期嘅快感同長遠嘅利益之間二揀一[註 1][4];如果話一個人衝動嘅程度高,通常係話佢傾向會揀短期快感多過揀長遠利益,而如果話一個人衝動嘅程度低,就通常係話佢傾向顧及長遠利益多啲[5][6]。
衝動呢個概念喺精神醫學同相關領域上好受關注:衝動性格可以引致好多唔健康嘅行為,例如衝動嘅人更加易會走去吸毒同有第啲形式嘅物質濫用[6],又或者係會成日衝動買嘢搞到財政上有問題[7];另一方面,研究又表明咗衝動係好多種心理病嘅重要症狀之一,好似過度活躍症(ADHD)[8]、躁鬱症(BPAD)[9]同埋好幾種嘅性格障礙[10]嘅患者都會有衝動得滯嘅情況。因為噉,理論性嘅心理學同神經科學上都有重點研究衝動,會諗衝動行為要點樣量度,又或者係諗應該用咩精神科藥先至可以有效噉處理衝動相關問題[11],而呢啲研究係廿一世紀初精神健康知識嘅重要一環。