生產
From Wikipedia, the free encyclopedia
生產(粵拼:sang1 caan2;英文:production)喺經濟學上係指透過結合唔同嘅物質(例:原材料)以及非物質(例:精神時間)輸入,嚟到製作出一啲可以用嚟消費-滿足到某啲人嘅慾望(有經濟價值)-嘅輸出嘅過程。舉幾個例說明[1][2]:
- 一間工廠嘅工人結合各種原材料加埋自己精神時間,最後製作出若干架汽車,而呢啲汽車可以滿足人(想要唔使吓吓去邊都行路)嘅慾望,消費者會願意為咗得到汽車付出資源(「資源」包括咗錢)。
- 一班工人結合水泥等嘅各種原材料加埋自己精神時間,製作出一棟住得人嘅建築物,而呢棟建築物可以滿足人(想要有瓦遮頭等)嘅慾望,消費者會願意為咗得到呢棟建築物而付出錢等嘅資源,令建築人員有利可圖。
- 一班人員喺度拍影片,最後製作出一段有吸引力嘅影片,而呢段影片可以(例如)上載去 YouTube,滿足觀眾(想要有娛樂)以及贊助商(想喺多人睇嘅影片嗰度落廣告)嘅慾望,所以觀眾會願意付出時間精神睇段片,而贊助商會肯俾錢要影片擁有者落廣告。
生產係經濟活動同增長嘅基礎。生產嘅目的係要滿足人嘅各種慾望,而生產所出嘅產品有幾能夠滿足慾望就往往係「經濟好唔好」嘅重要指標;有效率嘅生產能夠令人有效率噉滿衣食住行等嘅基本需要,變相令佢哋得閒諗(例如)點樣改善科技,而科技上嘅進步往往會提高生產效率-如是者,經濟就會係噉增長[3]。