漢字文化圈
(日文:漢字文化圏,平文式轉寫:Kanji Bunkaken;韓文:漢字文化圈,文觀部式轉寫:Hanja Munhwagwon;越南文:𥿺文化𡨸漢)係指大體上位於東亞、以源自中國嘅漢字爲文字媒介、文言爲語體媒介大量借用古典中文語彙、立足兼共享中華文化遺產嘅文化圈[1]。呢個文化圈嘅主要國家地區有中國、台灣、香港、澳門、韓國(大韓民國、北韓)、日本(同埋日本治下嘅琉球)、越南。有時包括東南亞嘅星加坡。由於唐人在東南亞比重大兼且影響力大,東南亞嘅馬來西亞有時計入呢個文化圈,係半圈屬地區;蒙古、藏地、新疆有受中華文化影響,但處於邊緣地帶,同時受其他文化(譬如印度文化圈、中亞文化圈等等)影響,所以係文化圈嘅模糊區。
由於漢字文化圈內嘅主要民族長期用漢字,佢哋嘅語言當中有好多中文成份,比如日文嘅漢語、韓文嘅漢字詞、越南文嘅漢越詞。透過呢個語文媒介,儒家思想成爲唨呢啲民族共有嘅文化背景,同時喺呢啲民族當中影響唨多數人嘅大乘佛敎,亦都係傳統文化源流之一;透過呢個語文媒介,促成唨文化圈內啲成員之間嘅文化、信息交流[1]。目前中國同日本繼續用開漢字,南韓有漢字但少用,北韓同越南廢除漢字。
漢字文化圈從地理角度又可以叫東亞文化圈[註 1];從文化角度又可稱爲儒家/教文化圈,重有稻米文化圈[註 2]、筷子文化圈[註 3]等稱呼。