反應時間
From Wikipedia, the free encyclopedia
反應時間(粵讀:faan2 jing3 si4 gaan3 | 英文:reaction time,RT)喺定義上係指「一個感官刺激出現」至「個體開始俾行為反應」之間嘅時間差,例如一個接波嘅人喺「見到投手掟出個波」至「開始移去個波飛向嘅位置」之間嘅時間差。反應時間係認知心理學同相關領域(神經科學等)上嘅研究成日會考慮嘅一個變數,俾研究者用嚟判斷受試者嘅心靈入面發生緊乜認知過程。
呢種對反應時間嘅研究就係所謂嘅心理測時法(mental chronometry)[2][3]。
舉個例說明,而家研究者搵受試者返嚟做一個有關專注力嘅實驗;佢要求受試者望實個熒幕,叫受試者每當熒幕有粒星閃過嗰陣(呢個時間點設做 ),就即刻撳隻踎士上面是但一個掣(受試者撳掣嗰一個時間點設做 );再一路用腦電圖(EEG)量度受試者嘅腦電活動-假設第啲因素不變,一個人愈專注做呢樣工作,佢理應反應會愈快( 數值會愈細),所以研究者就可以計吓 嘅值同邊啲腦電活動有統計相關,剖析人喺專注嗰時個腦裏面發生緊乜事[4]。
反應時間可以俾到一啲有用嘅資訊。喺人類當中,反應時間反映咗個腦入面啲神經細胞傳訊號以及處理資訊嘅速度,所以假設第啲因素不變,反應快係個腦處理速度高(認知功能勁)嘅表現,而反應慢可以係認知功能衰退嘅徵狀-研究顯示,智商(IQ)同反應時間有輕微嘅負相關[註 1][5],即係話智商高嘅人比較傾向會反應時間短(反應快)[6][7],而腦退化等涉及認知功能衰退嘅病可以引致反應變慢[8][9]。