人機互動
From Wikipedia, the free encyclopedia
人機互動(粵拼:jan4 gei1 wu6 dung6;英文:human–computer interaction,HCI)係電腦科學嘅一個子領域,結合電腦科學同心理學,研究用家同電腦之間嘅互動:例如人喺打機(用遊戲機呢樣電腦產品)嗰陣,好多時都會變到高度專注,而佢哋打機嗰時嘅專注程度會影響佢哋點樣撳掣,呢樣嘢又會影響部機跟住出乜嘢 output-HCI 上嘅技術同研究重點正正就在於觀察呢啲互動,分析件產品嘅狀態同用家嘅心理狀態點樣一齊隨住時間變化[1][2]。
HCI 呢門領域同時重視理論同實踐:一方面,HCI 似一門純科學,會作出純粹理論性嘅探究,嘗試用認知同相關嘅心理學概念嚟建立描述「人同電腦產品之間點樣互動」嘅理論模型;另一方面,HCI 又好似工程領域噉,有應用嘅成份,會留意「人類係點樣同電腦互動」嘅相關知識,並且諗吓呢啲知識可以點樣攞嚟改善電腦系統同軟件嘅設計[3][4]。
HCI 研究源於 1980 年代。當時 PC 興起,電腦唔再掗碇到吓吓一部機就霸嗮成間房,而且家用遊戲機(俾人喺屋企用嘅遊戲機,內置咗電腦嚟行啲遊戲程式)又開始盛行,令到電腦成為咗一樣廣泛噉俾好多人用嘅物品,亦引起電腦科學同認知科學等領域嘅研究者關注「一般人用起電腦嗰陣嘅行為係點樣」等嘅問題[5];打後喺廿世紀尾同廿一世紀初,資訊科技發展引起互聯網、智能手機同平板電腦等嘅創新,電腦開始大規模進入人嘅日常生活,亦令到 HCI 上嘅技術同研究變得更加複雜同豐富-HCI 變成唔淨只要諗「人點樣同 PC 互動」,仲要諗埋「人點樣同智能手機互動」等嘅問題[6]。