პანამა (ნოღა)
From Wikipedia, the free encyclopedia
პანამა (ესპ. Panamá) — პანამაშ ნანანოღა დო ქიანაშ უკაბეტაში ნოღა. იდვალუაფჷ პანამაშ არხიშ დაჭყაფუს, რჩქალი ოკიანეშ წყარპიჯის. 2013 წანაშ მუნაჩემეფით, ნოღაშ მახორობა 880,691 ადამიერს აკმადგინანს, აგლომერაციას 1 500 000-ს.[1] ნოღა პანამა ქიანაშ პოლიტიკური, ადმინისტრაციული დო კულტურული ცენტრი რე, თეშ მუჭოთ ოერეფოშქაშე ვაჭარუაშ დო კომერციაშ ნოსქვი.[2] ფასებული რე ბეტა რანგიშ გლობალური ნოღათ.[3]
ნანანოღა
|
ნოღა, 1519 წანაშ 15 მარაშინათუთას, ესპანალ კონკისტადორქ პედრო არიას დე ავილაქ დარსხჷ. თეშ უკული, ნოღა ინკეფიშ იმპერიაშ (პერუ) ოემაჭოფე ექსპედიციეფიშ დაჭყაფურ ჭურჭულს წჷმარინუანდჷ. პანამას გინმიშჷ ამერიკაშ კონტინენტიშ ისტორიას არძაშე შანულამი ოვაჭარე რზეფი, ნამუეფიშ მუკულათ ესპანეთიშა აბანობურ ინდიალეფს ნახირა ორქო-ვარჩხილიშ უკაბეტაში ნორთი მიშჷ.
1673 წანაშ 21 ღურთუთას, ნოღა მერეთ დაჩხირქ მოჯალაგჷ, ნამუთ კორსანტი ჰენრი მორგანქ გარჩქინჷ. მარა, 2 წანაშ დუდს, 1675 წანაშ 21 ღურთუთას, პანამაქ ოფიციალურო კჷნ აკინწყჷ, დუდმაართა ხორუაშე 8 კილომეტრის მადვალუ ჩქონს. თე აბანსჷთ ნანოღუ რდჷ, ნამუშ აკნაცჷმეფი ასე ხოლო რე დოსქილადირი დო პანამა-ვიეხოშ ჯოხოთ რე ჩინებული, ნამუთ 1997 წანას იუნესკოქ მოსოფელიშ მონძალაშ ძეგლეფიშ ერკებულშა გენშიონჷ.