Forse Armae Revołusionàrie de ła Cołónbia - Ezèrsito del Pòpoło
From Wikipedia, the free encyclopedia
Le Forse Armae Revołusionàrie de ła Cołónbia - Ezèrsito del Pòpoło (in spagnoło Fuerzas Armadas Revolucionarias de Colombia - Ejército del Pueblo, conoseste anca coi acrònemi de FARC o FARC-EP) łe ze stae na organizasion terorìstega comunista[1] de ła Cołónbia de ispirasion marxista-leninista[2][3][4], fondada inte el 27 de majo del 1964. I ga doparà sia vàrie tàteghe miłitari[5]-che magnere no convensionałi, cofà el terorismo.[6][7][8][9].Le oparasion de łe FARC-EP łe vegnea finansiae da rapimenti e rescati, da l'estrasion minerària iłegałe[10], da estorsion e tasasion de vàrie forme de atività econòmega e da ła produsion e destribusion de droghe iłegałi.[11][12] Le Nasion Unie łe ga stimà che, inte el 2008, el 12% dei sasigni de siviłi inte el conflito armà cołonbian i zera stai fati da łe FARC e de l'ELN (altra organizasion comunista), l'8% da łe forse de seguresa cołonbiane e łe restanti 80% da paramiłitari de estrema drita e altri[13].
Inte el 2007, łe FARC łe ghea declarà de èsare na forsa armada de 18.000 persone, inte el 2010, l'ezèrsito cołonbian el ghea stimà che łe FARC łe constase de 13.800 menbri, el 50% dei cuałi i zera guerejeri armai e, inte el 2011, el presidente de ła Cołónbia, Juan Manuel Santos, el ghea afermà che i zera formai da manco de 10.000 menbri. Inte el 2013 el zera sta referio che 26.648 menbri de łe FARC e de l'ELN i gaveva decidesto de desmobiłitarse dal 2002[14].
Dal 2008 al 2017, łe FARC łe atacava i patujamenti de połisia co mortari, fuziłi de precizion e esplozivi artezanałi, ponesto-ché no i zera considerai bastansa forti da poder èsar perìcuło par l'intiera unità de połisia[15]. Inte-ła-fin, inte el zugno del 2016, łe FARC łe ghea firmà un acordo de cesar el fogo co Juan Manuel Santos, vedesto cofà un paso istòrego par métar-fin al conflito che el zera durà da pì de 50 ani[16].
El 25 de agosto del 2016, Santos, el ga anunsà che 4 ani de negosiai i gaveva segurà un acordo de paze co łe FARC e che el 2 de otobre se garia vesto un referendum nasionałe par acetar o no l'acordo intrà stato e l'organizasion[17]. El referendum el ghea fałio, col 50,2% de voti contrari a l'acordo, defìnio dai so opozitori cofà un ris-cio de lejitimasion de ła viołensa e critegà cofà masa bon co łe FARC.[18][19][20][21] El goerno cołonbian e łe FARC i ghea firmà inte el 12 de novenbre del 2016 un acordo de paze revedesto[22]. El 27 de zugno del 2017, łe FARC łe ga finio de èsare un grupo armà, dezarmàndose e consegnando łe so armi a łe Nasion Unie. Un meze dopo, łe ga anuncià ła so reforma cofà partio pułìtego legałe, ła Forsa revołusionària alternativa comun, dopo renomenada Comunes dal 2021[23], che a łe prime ełesion nasionałi a łe cuałe i ghea partesipà i ghea ciapà solché el 0,36% dei consensi.[24][25]
Sirca 1.200 desidenti de łe FARC el ga refudà l'acordo de paze del 2016 e i ga continuà col tràfego de droga. Na picenina fasion de łe FARC ła ga anunsà el rescumìsio de l'atività armada inte el 29 de agosto del 2019, afermando che el goerno cołonbian no el respetava i acordi de paze.[26][27] El goerno cołonbian el ga respondesto co atachi miłitari, stermenando dei desidenti che i intendeva guidar el rearmo.[28]