Margot Robbie
From Wikipedia, the free encyclopedia
Si Margot Elise Robbie ( /ˈmɑːrɡoʊ ˈrɒbi/ MAR-goh-_-ROB-ee ; ipinanganak noong 2 Hulyo 1990) ay isang artista at prodyuser mula sa Australya. Kilala sa kanyang nagawa sa parehong pumatok sa takilya at independenteng mga pelikula, nakatanggap siya ng iba't ibang mga parangal, kabilang ang mga nominasyon para sa tatlong Academy Award, anim na BAFTA Award at apat na Golden Globe Award. Pinangalanan siya ng Time bilang isa sa 100 pinakamaimpluwensyang tao sa mundo noong 2017, at pinangalanan siya ng Forbes bilang ang aktres na may pinakamataas na suweldo sa mundo noong 2023.
Margot Robbie | |
---|---|
Kapanganakan | Margot Elise Robbie (1990-07-02) 2 Hulyo 1990 (edad 33) Dalby, Queensland, Australya |
Edukasyon | Kolehiyo ng Somerset |
Trabaho |
|
Aktibong taon | 2008–kasalukuyan |
Organisasyon | LuckyChap Entertainment |
Mga gawa | Buong tala |
Asawa | Tom Ackerley (k. 2016) |
Isinilang at lumaki sa Queensland, sinimulan ni Robbie ang kanyang karera noong 2008 sa seryeng pantelebisyon na Neighbors, kung saan naging regular siya hanggang 2011. Pagkatapos lumipat sa Estados Unidos, pinagbidahan niya ang seryeng pantelebisyon na Pan Am (2011–2012) at nagkaroon ng kanyang tagumpay noong 2013 sa pelikulang komedya ni Martin Scorsese na The Wolf of Wall Street. Nakamit niya ang mas malawak na pagkilala sa mga bidang pagganap bilang Jane Porter sa The Legend of Tarzan (2016) at Harley Quinn sa mga pelikulang DC Extended Universe, simula sa Suicide Squad (2016).
Nakatanggap si Robbie ng kritikal na pagbubunyi at nominasyon para sa Pinakamahusay na Aktres ng Academy Award para sa kanyang pagganap bilang figure skater (o nag-ii-skeyt) na si Tonya Harding sa pelikulang talambuhay na I, Tonya (2017). Nagpatuloy ang pagbubunyi na ito para sa kanyang mga pagganap bilang Reyna Elizabeth I sa Mary Queen of Scots (2018), Sharon Tate sa Once Upon a Time in Hollywood (2019), at isang empleyado ng Fox News sa Bombshell (2019). Ang huli sa mga ito ay nakakuha siya ng nominasyon para sa Pinakamahusay na Pansuportang Aktres ng Academy Awards. Mula noon, gumanap si Robbie bilang isang naghahangad na aktres sa pelikulang makasaysayan na Babylon (2022) at ang pantitulong manikang moda sa komedyang Barbie (2023), na lumabas bilang ang kanyang pelikulang may pinakamataas na kita at naging prodyuser din siya nito, na nakakuha siya ng nominasyon para sa Pinakamagandang Pelikula ng Academy Awards.
Si Robbie at ang kanyang asawa, ang tagagawa ng pelikula na si Tom Ackerley, ay nagtatag ng kompanyang produksyon na LuckyChap Entertainment noong 2014, kung saan gumawa sila ng ilang mga pelikula, kabilang ang I, Tonya, Promising Young Woman (2020), Barbie, at Saltburn (2023), pati na rin ang serye sa Hulu na Dollface (2019–2022) at ang miniserye ng Netflix na Maid (2021).