எரிதழல் மலை
From Wikipedia, the free encyclopedia
எரிதழல் மலைகள் (Flaming Mountains; சீனம்: 火焰山; பின்யின்: huǒyànshān) அல்லது கோச்சாங் மலைகள் (Gaochang Mountains) என்பன சீனாவில் சிஞ்சியாங் தன்னாட்சிப் பிரதேசத்தின் தியான்சன் மலைத்தொடர்களில் உள்ள மண் அரித்துச் செல்லப்பட்ட, தரிசாக உள்ள சிவப்பு மணற்கற்கள் கொண்ட மலைகள் ஆகும். இவை வடக்கில் தக்கிலமாக்கான்பாலைவனத்திற்கும் கிழக்கில் துருப்பன் நகருக்குமிடையே பரவியுள்ள மலைகளாகும். சிவப்பு மணற்பாறைப்படுகைகளில் எற்பட்டுள்ள மண்ணரிப்பு மற்றும் இடுக்குகளின் காரணமாக இம்மலையானது எரிதழல் போல் தோற்றமளிக்கிறது.
இம்மலையானது கிழக்கு மேற்காக சுமார் 100 கிலோமீட்டர்கள் (60 mi) நீளமும் 5–10 km (3–6 mi) அகலமும் கொண்டது. இதன் சராசரி உயரமானது 500 m (1,600 அடி) ஆகும். இதன் சில முகடுகள் 800 m (2,600 அடி)க்கும் மேலே அமைந்துள்ளன. இம்மலையை ஒட்டி சீனாவின் மிகப்பெரிய வெப்பநிலை அளக்கும் கருவி நிறுவப்பட்டுள்ளது. மிக முக்கியச் சுற்றுலாத் தலமான இம்மலையைச் சுற்றியுள்ள வெப்பநிலை இதன் மூலம் கணக்கிடப்படுகிறது. இங்குச் சில புதைபடிவங்கள் காணப்படுகின்றன.