रेस्पिरेटरी सिस्टम
From Wikipedia, the free encyclopedia
रेस्पिरेतरि सिस्तम धाःगु, साधारण अर्थय् मनू व पेपांचू पशुतेगु म्हय् दयाच्वंगु फय् हिलिगु म्हकुचातेगु छपुचः ख। साधारणतया सासः ल्हाइगु (breathing)यात हे थ्व व्यवस्थाया ज्या खः धका मनूतेसं थुइकिगु या, तर सासः ल्हाइगु धाःसा फय् हिलिगु व्यवस्थाया छगू भाग जक्क ख। निश्चित रुपय् धायेमासाः थ्व म्हकुचातेगु पुचलं वातावरण व मनूया सर्कुलेतरि सिस्तमया दथुइ वायु कायेबियेगु ज्या याइ। मनू व मेमेगु दुरुपा दुपिं पशुइ सासः ल्हाइगु कुचापुचलय् फय्लं कुचाः (airways), सों, व फय्या बाहा निर्धारण याइगु सासः लाधि(respiratory muscles) मू ख। मनूतेसं सासः ल्हाइबिलय् वातावरणया फय् न्हासं व म्हुतुं फय्धों जुसें सोंय् थ्यनि। मनूतेगु निगु सों दूगुलिं थ्व तःधंगु फय्धों निता सोंय् वनेत निता चिधंगु धोंय् बाइ। सोंय् थ्यनेधुंका हानं सोंया थीथी थासय् थ्यनेत थ्व निता धोंत चिचिधंगु धोंय् बायावनि। थथे बायावंगु धोंत सिक्क चिपुया वनेधुंका आखिरय् फय् हिलेगु थाय् वा एल्भियोलस धाःगु छगू ग्वल्लागु थासय् थ्यनि। एल्भियोलस क्यापिलरि धाःगु दकलय् चिपूगु हिधोंया स्वापूलि दयाच्वनि। एल्भियोलस व क्यापिलरि नितां हे सालुसे च्वंगु छता कोषं जक्क दयाच्वंगु संरचना जूगुलिं थ्व थासय् अक्सिजन व कार्बोन दाइअक्साइद दिफ्युजन जुसें वातावरण व हिया दथुइ हिलिगु ज्या जुइ। थ्व कथं रेस्पिरेतरी सिस्तमं हि व वातावरणया दथुइ फय् हिलेगु ज्याय् ग्वहालि याइ। थ्व म्हकुचा पुचलं म्हया एसिद-बेसया मात्रा संतुलनय् तयेत नं ग्वहालि याइ।