Península Eibérica
From Wikipedia, the free encyclopedia
La Península Eibérica queda ne l Sudoeste de la Ouropa. Politicamente, quatro países quédan nesta península: Pertual, Spanha i Andorra, para alhá dun anclabe território británico ultramarino, Gibraltar.
Formando quaije un trapézio, la Península liga-se al cuntinente ouropeu pul istmo custituído pula cordilheira de ls Pirenéus, sendo rodeada la Norte, Oeste i parte de l Sul pul ouceano Atlántico, i la restante cuosta sul i leste pul mar Mediterráneo. L sou punto mais oucidental ye l Cabo de la Ruoca i l mais ouriental l Cabo de Creus.
Cun ua altitude média bastante eilebada, apersenta predomínio de prainos rodeados por cadenas de muntanhas, i que son atrabessados puls percipales rius. Ls mais amportantes son l riu Teijo, l riu Douro, l riu Guadiana i l riu Guadalquebir, que zaguan ne l'ouceano Atlántico, i l riu Ebro, que, por sue beç, zagua ne l mar Mediterráneo.
Las eilebaçones mais amportantes son la Cordilheira Cantábrica, ne l Norte; l Sistema Penibético (serra Nebada) i l Sistema Bético (serra Morena), ne l Sul; i inda la Cordilheira Central (serra de Guadarrama), de que la serra de la Streilha ye l porlongamiento oucidental. Densamente poboada ne l litoral, la Península Eibérica ten fraca densidade populacional nas regiones anteriores. Eicepçon a esta regra ye la region de Madrid, mui poboada.