Germánicos
From Wikipedia, the free encyclopedia
Pobos germánicos ó germanos son un grupo etnolinguístico ando-ouropeu ouriginairo de l norte de la Ouropa i eidantificado pul uso de las lhénguas ando-ouropeias germánicas que se dibersificórun de l proto-germánico durante la Eidade de l Fierro pré-románica.
Ouriginados an cerca de 1800 a C, a partir de la cultura de la cerámica cordada na prainada norte almana, ls pobos germánicos spandiran-se pa l sul de la Scandinábia i pa l riu Bístula durante la Eidade de l Bronze Nórdica, atingindo l baixo Danúbio an 200 a.C. Ne l sec. II, ls teutones i cimbros entrórun an cunfronto cun Roma. Na época de Júlio César, un grupo de germánicos lhiderados pul xefe suebo Ariobisto spandiu-se pa la Gália, até ser detido por César ne ls Bosges an 58 a.C. Las tentatibas susequentes de l amperador Augusto d'aneixar territórios la lheste de l riu Reno fúrun abandonadas, depuis que l príncepe querusco Armínio aniquilou trés lhegiones romanas na Batailha de la Floresta de Teutoburgo an anho 9.
Ne l lheste, las tribos qu'habien migrado de la Scandinábia pa la parte anferior de l Bístula fúrun an direçon al sul, pressionando ls marcomanos la ambadir la Eitália an 166. Anquanto esso, ls germanos sofrírun anfluéncia atrabeç de l alfabeto etrusco, qu'acabou ouriginando l sou própio alfabeto rúnico. Por buolta de l Modelo:Sec. III, ls godos gobernórun ua basta ária al norte de l mar Negro, d'adonde cruzórun l baixo Danúbio ó biajórun pul mar, ambadindo la península Balcánica i la Anatólia, na altura de l Xipre. Anquanto esso, las crecentes cunfederaçones de francos i alamanos rompírun las frunteiras i se stablecírun al lhongo de la frunteira de l riu Reno, de forma cuntínua anfiltrando-se na Gália i na Eitália, anquanto ls piratas saxones debastórun las cuostas de la Ouropa Oucidental.
Depuis que ls hunos, ne l sec. IV, ambadiran ls territórios de l rei godo Heirmenerico que, an sou auge, stendian-se antre l riu Danúbio i l Bolga i de l mar Negro al mar Báltico, miles de godos fugiran pa ls Bálcanas, adonde anfligiran ua grande derrota subre ls romanos na Batailha de Adrianópolis i saqueórun Roma an 410 sob la lhiderança de Alarico I. Anquanto esso, bárias tribos germánicas se cumbertírun al cristandade ariano atrabeç de l missionairo Úlfilas, qu'ambentou un alfabeto para traduzir la Bíblia pa la lhéngua gótica.
Tenendo derrotado ls hunos ne ls Campos Cataláunicos i an Nedau, tribos germánicas migrantes ambadiran l Ampério Romano de l Oucidente i trasformórun nel na Ouropa Mediebal. Inda assi, fui solamente cula ajuda germánica que l'ampério fui capaç de subrebibir tanto tiempo cumo l fizo, sendo que l'eisército romano era quaije anteiramente cumpuosto por germanos por buolta de l sec. IV.[1]
Por buolta de l'anho 500, ls anglo-saxones stában na Grana-Bretanha i ls burgúndios ne l bal de l Ródano. Regidos por Teodorico, l Grande, ls ostrogodos se stablecírun na península Itálica, anquanto l lhíder bándalo Genserico saqueou Roma i fondou un reino na África.
An 507, ls besigodos fúrun spulsos puls francos de la maiorie de sues posses na Gália i depuis gobernórun un stado na Spánia. An 568, l lhíder lhombardo Alboíno ambadiu la Eitália i fondou un reino andependiente qu'an 774 fui derrubado por Carlos Magno, que fui coronado amperador de ls romanos an 800.
Ne l sec. VIII, marinheiros germánicos scandinabos ampeçórun ua fuorte spanson, fundando amportantes Stados na Ouropa Ouriental i na Fráncia, anquanto colonizórun l Atlántico até la América de l Norte. Mais tarde, las lhénguas germánicas se tornórun dominantes an bários países ouropeus, mas na Ouropa Meridional i na Ouropa Ouriental, l'elite germánica acabou por adotar ls dialetos natibos slabos ó lhatinos. Todos ls pobos germánicos acabórun sendo cumbertidos de l paganismo pa l cristandade. Ls pobos germánicos modernos son ls daneses, scandinabos, eislandeses, finlandeses de lhéngua sueca, lhuxemburgueses, belgas, suíços de lhéngua almana, almanes, houlandeses, scoceses de las tierras baixas, angleses, amaricanos i outros, qu'inda falan lhénguas deribadas de ls dialetos ancestrales germánicos.