Шуудангийн марк
From Wikipedia, the free encyclopedia
Шуудангийн марк-шуудангийн мөнгө төлсний баримт болгон захидал бичиг зэрэгт наах, мөнгө төгрөгийн тоо бүхий зурагт цаас юм. Шуудангийн маркийн улс, үндэсний шуудан харилцааны байгууллага гаргадаг.
Дэлхийн анхны стандарт хэлбэрийн шуудангийн марк 1840 оны 5-р сарын 6-нд Английн хатан хаан Викториагийн хөрөг зурагтай "Хар пенни" (англи. Penny Black) нэртэй гарсан байна. Учир нь тэрхүү марк хар өнгөтэй байсан бөгөөд үнэ нь 1 пенни байжээ. Анхны марк Роуланд Хилл (англи. Rowland Hill; 1795-1879) -ийн хичээл зүтгэлээр гарсан гэж үздэг.
Шуудангийн марк нэвтрүүлсэнээр Английн шуудан холбоонд томоохон дэвшилтэд шинэчлэл болж шууданг илгээлтийн боловсруулалтыг хөнгөвчилж, тэдгээрийн төлбөр тооцоог хялбаршуулсанаар захидал илгээх явдал өсөхөд их хувь нэмэр оруулж (1839 онд 75 сая захидал илгээдэг байсан бол 1840 онд 168 сая хүрсэн байна). Шинэчлэл хийсэн Роуланд Хилл 1854 онд Английн шуудангийн ерөнхий нарийн бичгийн дарга болж, Английн Засгийн газраас 20,000 фунт стерлингийн бэлэг авчээ. Сүүлд Лондон хотод Р.Хиллийн хөшөө босгосон байдаг юм.
Английн араас бусад орнуудад марк хэрэглэж эхэлсэн байна. 1843 онд- Цюрих, Женев контонд, Бразилд, 1847 онд АНУ-д, 1849 онд Франц, Бельги, Бавари, 1854 онд Энэтхэг, 1857 онд Орос, 1860 онд Польш, 1871 онд, 1871 онд Япон, 1872 онд Герман (нэгдсэн), 1878 онд Хятад гэх мэт улс орнуудад шуудангийн марк гарч захидал илгээхэд ашиглаж эхэлжээ.
Монгол Улсын шуудангийн анхны марк 1924 онд гарчээ. Энэ марк нь Ардын засгийн газрын түшмэл Бат-Очир гэдэг хүний санаачилгаар хэвлэсэн “Элдэв-Очир” марк юм. Маркийн зургийг нь “марзан” Б.Шарав зурсан байна.
Шуудангийн марк нь гол төлөв тэгш өнцөгт хэлбэртэй жижиг хэмжээний, эрмэгийг нь тойруулсан шүдтэй, ар талдаа цавуутай цаас юм. Нүүрэн талдаа тухайн маркны нэрлэсэн үнээс гадна түүнийг олгосон шуудангийн захиргааны нэрийг агуулсан байдаг. Энэ нь ихэвчлэн янз бүрийн тэмдэг, гоёл чимэглэлийн элементүүд, зураг дүрсэлсэн байдаг бөгөөд тухайн сэдвээр хэд хэдэн цуврал марк байх нь элбэг. Ийм ч учраас маркийг хүмүүс цуглуулдаг байна.