വിർജീനിയ ഡെയർ
From Wikipedia, the free encyclopedia
വിർജീനിയ ഡെയർ (ജനനം : 1587 ആഗസ്റ്റ് 18, മരണം : അജ്ഞാതം) ന്യൂവേൾഡ് എന്നു വിളിക്കപ്പെട്ട അമേരിക്കൻ ഭൂഖണ്ഡത്തിലെ ബ്രിട്ടീഷ് കോളനികളിൽ ജനിച്ച ആദ്യ ഇംഗ്ലീഷ് ശിശുവായിരുന്നു. ഇംഗ്ലീഷ് മാതാപിതാക്കളായ അനനിയാസ് ഡെയർ, എലീനർ വൈറ്റ് (എല്ലിനോർ, എലിനൂർ എന്നും പറയുന്നു)[1] എന്നിവർക്കു ജനിച്ച കുട്ടിയ്ക്ക് വിർജീനിയ കോളനിയുടെ പേരിനെ ആസ്പദമാക്കി വിർജീനിയ എന്ന പേരു നൽകപ്പെട്ടു.[2] വിർജീനിയയ്ക്കും കോളനിയിലെ മറ്റു കുടിയേറ്റക്കാർക്കും എന്തുസംഭവിച്ചു എന്ന കാര്യം ഇന്നും ഒരു മിഥ്യയായി അവശേഷിക്കുന്നു. അവരുടെ ജനനത്തെക്കുറിച്ചുള്ള വസ്തുത തിരിച്ചറിയപ്പെട്ടിട്ടുണ്ട്. വിർജീനിയയുടെ മുത്തച്ഛനും കോളനിയുടെ ഗവർണറുമായിരുന്ന ജോൺ വൈറ്റ് പുതിയ കോളനിയ്ക്കു വേണ്ട അവശ്യസാധനങ്ങൾ സംഭരിക്കുവാൻ 1587 ൽ ഇംഗ്ലണ്ടിലേയ്ക്കു തിരിച്ചുപോയിരുന്നു. അത്യാവശ്യസാധനങ്ങളുമായി വൈറ്റ് മൂന്നു വർഷത്തിനുശേഷം കോളനി നിലനിന്നിരുന്ന പ്രദേശത്തു തിരിച്ചെത്തിയപ്പോൾ കോളനിവാസികൾ ദുരൂഹമായി അപ്രത്യക്ഷരായിരുന്നു.
അതിനു ശേഷം കഴിഞ്ഞ നാനൂറു വർഷങ്ങളിലധികമായി വെർജീനിയ കോളനിയും നിവാസികളും അമേരിക്കൻ കെട്ടുകഥകളിലെയും നാടോടിക്കഥകളിലെയും ഒരു പ്രധാനവിഷയമായിരുന്നു. അവരുടെ പേര് വിവിധ ഉപഭോഗവസ്തുക്കളും വാനില ഉൽപ്പന്നങ്ങളും, ശീതള പാനീയങ്ങളും വൈനുകളും മദ്യവും വിറ്റഴിക്കുവാൻ ബ്രാൻഡ് പേരായി ഉപയോഗിച്ചുവരുന്നു. അതുപോലെ അമേരിക്കൻ കവിതകൾ, പുസ്തകങ്ങൾ, കോമിക് ബുക്കുകൾ, ടെലിവിഷൻ പരിപാടികളിലൊക്കെ അവരെ ഒരു പ്രധാന കഥാപാത്രമാക്കിയിരിക്കുന്നു. വടക്കൻ കരോലിനയിലെ അനേകം സ്ഥലങ്ങൾ അവരുടെ ബഹുമാനാർത്ഥം വിർജീനിയ എന്നു നാമകരണം ചെയ്യപ്പെട്ടിരിക്കുന്നു.