ലുക്രീഷ്യ മോട്ട്
From Wikipedia, the free encyclopedia
ഒരു അമേരിക്കൻ സാമൂഹ്യ പരിഷ്കർത്താവും ക്വാക്കറുമായിരുന്നു ലുക്രീഷ്യ മോട്ട്. അടിമത്ത നിരോധനത്തിനും സ്ത്രീ ശാക്തീകരണത്തിനുമായി പ്രവർത്തിച്ചു. 1840 ൽ ലണ്ടനിൽ നടന്ന ലോക അടിമത്ത വിരുദ്ധ കൺവെൻഷനിൽ നിന്ന് ഒഴിവാക്കപ്പെട്ട സ്ത്രീകളിൽ ഒരാളായപ്പോൾ അവർ സമൂഹത്തിലെ സ്ത്രീകളുടെ സ്ഥാനം പരിഷ്കരിക്കാനുള്ള ആശയം രൂപപ്പെടുത്തി. 1848 ൽ ജെയിൻ ഹണ്ട് അവരെ സ്ത്രീകളുടെ അവകാശങ്ങളെക്കുറിച്ചുള്ള ഒരു പൊതുയോഗമായ സെനെക്ക ഫാൾസ് കൺവെൻഷനിലേക്ക് ക്ഷണിച്ചു. ഈ സമയത്ത് മോട്ട് ഡിക്ലറേഷൻ ഓഫ് സെന്റിമെന്റ്സ് സഹഎഴുത്തുകാരിയായി.
അവരുടെ പ്രസംഗിക്കാനുള്ള കഴിവ് അവരെ ഒരു പ്രധാന ഉന്മൂലനവാദിയും ഫെമിനിസ്റ്റും പരിഷ്കർത്താവും ആക്കി. പ്രായപൂർത്തിയായപ്പോൾ അവർ ഒരു ക്വേക്കർ പ്രസംഗകയായിരുന്നു. 1865 -ൽ അമേരിക്ക അടിമത്തം നിരോധിച്ചപ്പോൾ മുൻ അടിമകൾക്ക്, ആണിനും പെണ്ണിനും വോട്ടവകാശം (Suffrage) നൽകണമെന്ന് അവർ വാദിച്ചു. 1880-ൽ മരിക്കുന്നതുവരെ അവർ പരിഷ്കരണ പ്രസ്ഥാനങ്ങളിലെ ഒരു പ്രധാന വ്യക്തിയായിരുന്നു.