റോബർട്ട് മിച്ചം
അമേരിക്കൻ ചലചിത്ര നടൻ / From Wikipedia, the free encyclopedia
റോബർട്ട് ചാൾസ് ഡർമാൻ മിച്ചം (ജീവിതകാലം: ഓഗസ്റ്റ് 6, 1917 - ജൂലൈ 1, 1997) ഒരു അമേരിക്കൻ നടനും സംവിധായകനും എഴുത്തുകാരനും കവിയും സംഗീതസംവിധായകനും ഗായകനുമായിരുന്നു. ദി സ്റ്റോറി ഓഫ് ജി.ഐ. ജോ (1945) എന്ന ചിത്രത്തിലെ വേഷത്തിന് മികച്ച സഹനടനുള്ള അക്കാദമി അവാർഡ് നാമനിർദ്ദേശം ലഭിച്ചതോടെ അദ്ദേഹം പ്രശസ്തിയിലേക്ക് ഉയരുകയും തുടർന്ന് നിരവധി ക്ലാസിക് സിനിമാ വിഭാഗങ്ങളിൽ അഭിനയിക്കുകയും ചെയ്തു. 1950 കളിലും 1960 കളിലും സിനിമയിൽ പ്രചരിച്ചിരുന്ന പ്രതിനായകന്മാരുടെ മുൻഗാമിയായാണ് അദ്ദേഹത്തിന്റെ അഭിനയം പൊതുവെ കണക്കാക്കപ്പെടുന്നത്. തേർട്ടി സെക്കൻഡ് ഓവർ ടോക്കിയോ (1944), ഔട്ട് ഓഫ് ദ പാസ്റ്റ് (1947), റിവർ ഓഫ് നോ റിട്ടേൺ (1954), ദി നൈറ്റ് ഓഫ് ദി ഹണ്ടർ (1955), തണ്ടർ റോഡ് (1958), കേപ് ഫിയർ (1962) എൽ ഡൊറാഡോ (1966), റയാൻസ് ഡോട്ടർ (1970), ദ ഫ്രണ്ട്സ് ഓഫ് എഡ്ഡി കോയിൽ (1973) എന്നിവയാണ് അദ്ദേഹത്തിന്റെ ഏറ്റവും അറിയപ്പെടുന്ന സിനിമകൾ. ടെലിവിഷനിലെ ദി വിൻഡ്സ് ഓഫ് വാർ (1983), അതിൻറെ തുടർച്ചയായ വാർ ആൻഡ് റിമെംബ്രൻസ് (1988) എന്നീ ഇതിഹാസ മിനി പരമ്പരകളിൽ യു.എസ്. നേവി ക്യാപ്റ്റൻ വിക്ടർ "പഗ്" ഹെൻറി എന്ന കഥാപാത്രത്തെ അവതരിപ്പിച്ചതിൻറെ പേരിലും അദ്ദേഹം പ്രശസ്തനാണ്. അമേരിക്കൻ ഫിലിം ഇൻസ്റ്റിറ്റ്യൂട്ടിന്റെ ക്ലാസിക് അമേരിക്കൻ സിനിമയിലെ ഏറ്റവും മികച്ച പുരുഷ താരങ്ങളുടെ പട്ടികയിൽ മിച്ചം 23-ാം സ്ഥാനത്താണുള്ളത്.[1]