രക്തം കട്ടപിടിക്കൽ
From Wikipedia, the free encyclopedia
ശരീരത്തിൽ നിന്നും അമിതമായി രക്തം വാർന്ന് ശരീരത്തിന്റെ സ്ഥിതിസ്ഥിരാവസ്ഥ (ഹീമോസ്റ്റാസിസ്) നഷ്ടപ്പെടാതിരിക്കുന്നതിന് ശരീരം സ്വീകരിക്കുന്ന രക്ഷാമാർഗ്ഗമാണ് രക്തം കട്ടപിടിക്കൽ. രക്തം കട്ടപിടിക്കുന്ന പ്രക്രിയയെ ബ്ലഡ് ക്ലോട്ടിംഗ്, ബ്ലഡ് കൊയാഗുലേഷൻ, ത്രോംബോജനസിസ് എന്നീ പദങ്ങളുപയോഗിച്ചും സൂചിപ്പിക്കുന്നു. പൊതുവേ ശരീരത്തിലുണ്ടാകുന്ന മുറിവുകൾ രക്തക്കുഴലുകളെ മുറിക്കുകയും അതിനെത്തുടർന്ന് രക്തക്കുഴലുകളെ അമർത്തുക വഴിയും (വാസ്കുലാർ കൺസ്ട്രിക്ഷൻ) പ്ലേറ്റലറ്റ് കോശങ്ങൾ സൃഷ്ടിക്കുന്ന രക്തപ്രവാഹതടസ്സം വഴിയും (പ്ലേറ്റലറ്റ് പ്ലഗ്ഗ്), രക്തം കട്ടപിടിക്കൽ പ്രക്രിയ വഴി രക്തക്കട്ട രൂപപ്പെട്ട് മുറിവുഭാഗം അടയ്ക്കുക വഴിയും, പുതുതായി രൂപപ്പെടുന്ന രക്തക്കട്ടയിലേയ്ക്ക് സമീപസ്ഥ ഫൈബ്രസ് കലകൾ വളർന്നെത്തുകവഴി മുറിവുഭാഗം സ്ഥിരമായി അടയ്ക്കുക വഴിയും രക്തനഷ്ടം തടഞ്ഞ് സ്ഥിരാവസ്ഥ പ്രാപിക്കുന്നു. ഇത്തരം പ്രവർത്തനങ്ങളിൽ പ്ലേറ്റലറ്റുകൾ എന്നറിയപ്പെടുന്ന രക്തകോശങ്ങൾക്ക് (ത്രോംബോസൈറ്റുകൾ) പ്രധാന പങ്കുണ്ട്. രക്തലോമികകൾക്കുൾവശം ഏറെ മിനുസമേറിയതാണ്. എന്നാൽ ഒരു മുറിവ് രൂപപ്പെടുന്ന അവസരത്തിൽ ഇവിടം പരുക്കനായിത്തീരുകയും അവിടെ പ്ലേറ്റലറ്റുകൾ തങ്ങിനിൽക്കുകയും ചെയ്യുന്നു. അവ ശിഥിലീകരിക്കപ്പെട്ട് രൂപപ്പെടുന്ന ഒരു സവിശേഷ രാസാഗ്നി (ത്രോംബോപ്ലാസ്റ്റിൻ) കാൽസ്യം അയോണിന്റെ സാന്നിദ്ധ്യത്തിൽ സൃഷ്ടിക്കുന്ന രാസപ്രവർത്തനങ്ങളുടെ ഫലമായി മുറിവിനുപുറത്ത് നേരിയ ഫൈബ്രിൻ തന്തുക്കൾ രൂപപ്പെടുന്നു. ഇവയിൽ ചുവന്ന രക്താണുക്കളും പ്ലേറ്റലററുകളും തങ്ങിനിന്ന് രക്തക്കട്ട രൂപപ്പെടുന്നു. അൻപതിൽപ്പരം വ്യത്യസ്ത രക്തഘടകങ്ങളുടെ സാന്നിദ്ധ്യത്തിലാണ് ഈ പ്രവർത്തനം ശരീരത്തിൽ നടക്കുന്നത്.