ദൃശ്യകലകൾ
From Wikipedia, the free encyclopedia
പെയിന്റിംഗ്, ഡ്രോയിംഗ്, പ്രിന്റ് മേക്കിംഗ്, ശില്പകല, സെറാമിക്സ്, ഫോട്ടോഗ്രാഫി, വീഡിയോ, സിനിമാ നിർമ്മാണം, രൂപകല്പന, കരകൌശലം, വാസ്തുവിദ്യ തുടങ്ങിയ കലകളാണ് ദൃശ്യ കലകൾ അഥവാ വിഷ്വൽ ആർട്സ് എന്ന് അറിയപ്പെടുന്നത്. പെർഫോമൻസ് ആർട്സ്, കൺസെപ്ച്വൽ ആർട്ട്, ടെക്സ്റ്റൈൽ ആർട്സ് തുടങ്ങി നിരവധി കലാപരമായ വിഷയങ്ങളിൽ ദൃശ്യ കലയുടെ വശങ്ങളും മറ്റ് തരത്തിലുള്ള കലകളും ഉൾപ്പെടുന്നുണ്ട്. കൂടാതെ, പ്രയുക്ത കലകളായ[1] വ്യവസായ ഡിസൈൻ, ഗ്രാഫിക് ഡിസൈൻ, ഫാഷൻ ഡിസൈൻ, ഇന്റീരിയർ ഡിസൈൻ, അലങ്കാര കല എന്നിവയും ദൃശ്യ കലകൾ എന്ന നിർവ്വചനത്തിൽ വരുന്നവയാണ്.[2] [3]
- കേരളത്തിലെ ദൃശ്യ കലകളെക്കുറിച്ച് അറിയാൻ, ദയവായി കേരളത്തിലെ ദൃശ്യകലകൾ കാണുക.
"വിഷ്വൽ ആർട്സ്" എന്ന പദത്തിന്റെ നിലവിലെ ഉപയോഗത്തിൽ സുന്ദര കലയും പ്രയുക്ത അല്ലെങ്കിൽ അലങ്കാര കലകളും കരകൌശല വസ്തുക്കളും ഉൾപ്പെടുന്നു. എന്നാൽ ഇത് എല്ലായ്പ്പോഴും അങ്ങനെയായിരുന്നില്ല. ഇരുപതാം നൂറ്റാണ്ടിന്റെ തുടക്കത്തിൽ ബ്രിട്ടനിലും മറ്റിടങ്ങളിലും ആർട്സ് ആൻഡ് ക്രാഫ്റ്റ്സ് പ്രസ്ഥാനത്തിന് മുമ്പ്, നൂറ്റാണ്ടുകളായി 'ആർട്ടിസ്റ്റ്' എന്ന പദം ഫൈൻ ആർട്ടുകളിൽ (പെയിന്റിംഗ്, ശിൽപം, അല്ലെങ്കിൽ അച്ചടി നിർമ്മാണം പോലുള്ളവ) ജോലി ചെയ്യുന്ന ഒരു വ്യക്തിക്ക് മാത്രമായി പരിമിതപ്പെടുത്തിയിരുന്നു. അലങ്കാര കലകൾ, കരകൌശലം അല്ലെങ്കിൽ പ്രായോഗിക വിഷ്വൽ ആർട്സ് മീഡിയ ഒക്കെ ഇതിൽഉൾപ്പെട്ടിരുന്നില്ല. ആർട്സ് ആൻഡ് ക്രാഫ്റ്റ്സ് മൂവ്മെന്റിന്റെ കലാകാരന്മാരാണ് ഈ വ്യത്യാസം ഊന്നിപ്പറഞ്ഞത്.[4] പഴയ കാലത്ത് ആർട്ട് സ്കൂളുകൾ ഫൈൻ ആർട്ടുകളും കരകൌശല മേഖലയും തമ്മിൽ വേർതിരിവ് കാണിച്ചിരുന്നു. ഒരു കരകൗശല വിദഗ്ദ്ധനെ കലയുടെ പരിശീലകനായി കണക്കാക്കാനാവില്ലെന്നാണ് അക്കാലത്ത് വാദിച്ചിരുന്നത്.