കണ്ണീരിന്റെ പാത
“ട്രെയിൽ ഓഫ് ടിയേർസ്” എന്നറിയപ്പെടുന്നത് തങ്ങളുടെ പൈതൃക ഭൂമിയിൽ നിന്നുള്ള (പ്രധാനമായി തെക്ക / From Wikipedia, the free encyclopedia
“ട്രെയിൽ ഓഫ് ടിയേർസ്” എന്നറിയപ്പെടുന്നത് തങ്ങളുടെ പൈതൃക ഭൂമിയിൽ നിന്നുള്ള (പ്രധാനമായി തെക്കുകിഴക്കൻ പ്രദേശങ്ങളിൽ നിന്ന്) മിസിസിപ്പി നദിയുടെ പടിഞ്ഞാറൻ പ്രദേശങ്ങളിലേയ്ക്കുള്ള തദ്ദേശീയ അമേരിക്കൻ ഇന്ത്യൻ വർഗ്ഗക്കാരുടെ നിർബന്ധിത നീക്കം ചെയ്യൽ പരമ്പരയാണ്. 1830 ൽ പാസാക്കപ്പെട്ട ഇന്ത്യൻ റിമൂവൽ ആക്റ്റ് പ്രകാരമുള്ള ഈ നിർബന്ധിത നീക്കം ചെയ്യൽ നിയമം നടപ്പിൽ വരുത്തുന്നതിനായി അനേകം സർക്കാർ ഉദ്ദ്യോഗസ്ഥന്മാർ നിയോഗിക്കപ്പെട്ടു. നീക്കം ചെയ്യപ്പെടലിന് നിർബന്ധിതരായ തദ്ദേശീയ ജനങ്ങൾ തങ്ങൾക്കായി നീക്കിവയ്ക്കപ്പെട്ട വിവിധ വിദൂര പ്രദേശങ്ങളിലേയ്ക്കുള്ള യാത്രാമദ്ധ്യേ, ലക്ഷ്യങ്ങളിലെത്തുന്നതിനുമുമ്പ് കാലാവസ്ഥാ വ്യതിയാനങ്ങളാലും രോഗങ്ങൾ പിടിപെട്ടും പട്ടിണിയാലും കൊല്ലപ്പെട്ടു. ഏകദേശം നാലായിരത്തിലധികം തദ്ദേശീയ ഇന്ത്യൻ ജനങ്ങളാണ് ഈവിധം കൊല്ലപ്പെട്ടത്. ചെറോക്കീ, മുസ്കോഗീ, സെമിനോൾ, ചിക്കാൻസൌ, ചോക്റ്റോ രാഷ്ട്രങ്ങളിൽനിന്നുള്ള പല വർഗ്ഗങ്ങളിലെ ജനങ്ങൾ ഇപ്രകാരം വിധിവൈപരീത്യത്താൽ കൊല്ലപ്പെടുകയുണ്ടായി. 1838 ൽ ചെറോക്കീ നേഷൻറെ നീക്കം ചെയ്യലിനോടനുബന്ധിച്ചുള്ള വിവരണത്തിൽനിന്നുമാണ് വാക്യം ഉടലെടുത്തത്..[1][2][3]
1830 നും 1850 നുമിടയ്ക്കുള്ള വർഷങ്ങളിൽ ചിക്കാൻസോ, ചോക്ക്റ്റോ, ക്രീക്ക്, സെമിനോൾ, ചെറോക്കീ തദ്ദേശീയ ജനങ്ങളും അവരോടൊപ്പം യൂറോപ്യൻ കുടിയേറ്റക്കാർ ആഫ്രിക്കയിൽ നിന്ന് അടിമകളായി കൊണ്ടുവരികയും പിന്നീട് സ്വതന്ത്ര്യം നൽകിയതുമായ ആഫ്രിക്കൻ വംശജരും ഇവ്വിധം നീക്കം ചെയ്യപ്പെട്ടവരിൽ ഉൾപ്പെട്ടിരുന്നു.[4] ഈ തദ്ദേശവാസികൾ വെള്ളക്കാരായ നാടൻ കുടിയേറ്റപ്പടയുടെയും യു.എസ്. സർക്കാരിൻറെയും ഭീഷണിയാൽ അണിയണിയായി പടിഞ്ഞാറുള്ള വിദൂരദേശങ്ങളിലേയ്ക്ക് കാൽനടയായി യാത്രചെയ്തു.[5] ഭൂരിപക്ഷം പേരും ലക്ഷ്യത്തിലെത്തുന്നതിനുമുമ്പ് മരിച്ചുവീണു
ഇതിൽ 1838 ൽ സംഭവിച്ച ചെറോക്കി വർഗ്ഗത്തിൻറെ നീക്കം ചെയ്യൽ 1828 ൽ ഡഹ്ലോനെഗ, ജോർജിയ എന്നിവിടങ്ങളിലെ സ്വർണ്ണഖനികളുടെ കണ്ടുപിടിത്തത്തോടെയാണ് ആരംഭിച്ചത്. ജോർജിയ ഗോൾഡ് റഷിൻറെ കാലത്ത് അനേകായിരം വെള്ളക്കാരായ കുടിയേറ്റക്കാർ ഈ പ്രദേശങ്ങളിലേയ്ക്ക് ഒഴുകിയെത്തി.[6] നിർബന്ധിത നീക്കം ചെയ്യലിനു വിധേയരായ 16,543 ചെറോക്കി ഇന്ത്യക്കാരിൽ ഏകദേശം 2,000 നും 6000 ത്തിനുമിടയ്ക്കുള്ള ജനങ്ങൾ മാർഗ്ഗമദ്ധ്യേ മരണമടഞ്ഞു.[7][8][9][10][11]