അന്റാർട്ടിക് വൃത്തം
From Wikipedia, the free encyclopedia
ഭൂമിയിലെ പ്രധാനമായ അഞ്ച് അക്ഷാംശവൃത്തങ്ങളിൽ ഏറ്റവും തെക്കുള്ള സാങ്കല്പിക വൃത്തമാണ് അന്റാർട്ടിക് വൃത്തം (ഇംഗ്ലീഷ്: Antarctic Circle). അതായത് ഭൂമദ്ധ്യരേഖയ്ക്ക് തെക്ക് 66°33′ അക്ഷാംശരേഖയാണ് അന്റാർട്ടിക് വൃത്തം എന്ന് അറിയപ്പെടുന്നത്. അന്റാർട്ടിക് വൃത്തത്തിനു തെക്കുള്ള മേഖല അന്റാർട്ടിക് പ്രദേശം എന്നും തൊട്ട് വടക്കുള്ള പ്രദേശം ദക്ഷിണ മിതോഷ്ണമേഖല എന്നും അറിയപ്പെടുന്നു. വർഷത്തിൽ ഒരിക്കലെങ്കിലും സൂര്യൻ ഇരുപത്തിനാലു മണിക്കൂർ ചക്രവാളത്തിനു മുകളിലായി അർധരാത്രിയിൽ പോലും ദൃശ്യമായി അസ്തമിക്കാതെയിരിക്കുന്നു. വർഷത്തിൽ ഒരിക്കലെങ്കിലും സൂര്യന്റെ മദ്ധ്യഭാഗം ചക്രവാളത്തിനു താഴെയായി നട്ടുച്ചക്കുപോലും ദൃശ്യമാകാതെയുമിരിക്കുന്നു. ആർട്ടിക് വൃത്തത്തിലും ഇത് അനുഭവപ്പെടുന്നുണ്ട്.
അന്റാർട്ടിക് വൃത്തത്തിന്റെ സ്ഥാനം സ്ഥിരമല്ല; 2017 ഏപ്രിൽ 27-പ്രകാരം, അന്റാർട്ടിക് വൃത്തം ഭൂമദ്ധ്യരേഖയിൽനിന്നും 66°33′46.7″ തെക്കായി സ്ഥിതിചെയ്യുന്നു.[1] ഇതിന്റെ രേഖാംശം ഭൂമിയുടെ അച്ചുതണ്ടിന്റെ ചരിവിനെ ആശ്രയിച്ചിരിക്കുന്നു. 40,000വർഷം കാലയളവിൽ ഇതിന് 2° എന്ന പരിധിയിൽ സ്ഥാനചലനം ഉണ്ടാകാറുണ്ട്. ചന്ദ്രന്റെ പരിക്രമണം മൂലമുണ്ടാകുന്ന ടൈഡൽ ഫോർസ് കാരണമാണിങ്ങനെ സംഭവിക്കുന്നത്.[2] ഇതിനാൽ അന്റാർട്ടിക് വൃത്തത്തിന് ഇപ്പോൾ വർഷത്തിൽ 15 മീ. (49 അടി) എന്ന അളവിൽ തെക്കോട്ട് സ്ഥാനചലനം സംഭവിച്ചുകൊണ്ടിരിക്കുന്നു.