Luxembörg (stad)
From Wikipedia, the free encyclopedia
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Luxembörg (Luxembörgs: Lëtzebuerg) is de hoofstad vaan Luxembörg (land), en Luxembörg (kanton). De stad en gemeinte heet mer 88.586 inwoeners (2009) en 'n oppervlak vaan 51,46 km², mer is toch same mèt Straotsburg en Brussel de belaankriekste stad vaan de Europese Unie (EU). De EU heet hei väöl vesteginge, zoewie 't Europees Hof vaan Justitie, de Europese Reikenkamer, 't Sikkertariaot vaan 't Europees Parlemint (neet 't Europees Parlemint zelf), de Europese Investeringsbaank (neet de Europese Centraole Baank), 't Europees Investeringsfonds, 't Europees Stabiliteitsmechanisme en Eurostat.
Luxembörg is ein vaan de riekste stei op 't continent, wat deils verklaort boerum 't zoeväöl boetelenders gief in de stad. Op force vaan de census vaan 2019 waor zoe'n 70% vaan de stadse bevolking neet-Luxembörgs (vis-á-vis 30% boetelenders in 't gans land). De meiste vaan dees boetelenders zien Westers, get wat wieneg veurkump in Europese stei.