Jan Hus
From Wikipedia, the free encyclopedia
De Jan Hus (och Johannes Huss genannt), gebuer ëm 1369, neie Quellen no den 1. Juli 1372, warscheinlech zu Husinec, Okres Prachatice, haut an Tschechien, a gestuerwen de 6. Juli 1415 zu Konstanz, war e chrëschtlechen Theolog, Priedeger a Reformateur.
Jan Hus | |
---|---|
Pseudonym | Paulus Constantius |
Gebuer | 1371 jul. |
Gestuerwen |
6. Juli 1415 jul. Konstanz |
Nationalitéit | Hellegt Réimescht Räich vun Däitscher Natioun |
Educatioun | Karls-Universitéit |
Aktivitéit | Iwwersetzer, Theolog, Pedagog, Universitéitsprofesser, Schrëftsteller, Philosoph, Paschtouer, Linguist, Enseignant, Priedeger, Paschtouer |
Hie war eng Zäit laang Rekter vun der Karls-Universitéit Prag, wou en och Philosophie an Theologie enseignéiert huet.
Hien huet 1402 agefouert, datt Lidder an de Massen op Tschechesch gesonge goufen. Ausserdeem huet hien eng Reform vun der Schreifweis vum Tschecheschen ausgeschafft. A senge Priedegten huet hie fir géint déi ondugend "modern" Mouden a Liewensweise gepriedegt, a sech sou mat den Zënft vun de Schouster, Goldschmëdd, Wäinhhändler a Wierten an d'Hoer kritt.
Hien huet och géint de weltleche Räichtum vun der Kierch gepriedegt, géint de Gascht an d'Dekadenz vum Klerus. Hien huet fir eng Reform vun der verweltlechter Kierch gekämpft, ass fir d'Gewëssensfräiheet agetrueden an huet d'Bibel,an net de Poopst, als déi eenzeg Autoritéit a Glawensfroen ugesinn.
1408 huet seng Hierarchie him verbueden, weider Massen ze halen an ze priedegen. Den Hus huet sech awer net dodru gehalen a weidergemaach; an ëmmer méi Leit a Béimen fonnt, déi him nolauschtere koumen a seng Vuë gedeelt hunn.
De Prager Äerzbëschof huet sech dem Poopst Alexander V., engem vun den deemools dräi Peepst, ënnerworf, an als "Belounung" eng Bull erwierkt, déi den 9. Mäerz 1410 publizéiert gouf. Domat goufe Schrëften an d'Léiermeenunge vum John Wyclif verbueden, un deem sech den Hus staark orientéiert huet. Am Juli 1410 gouf den Hus aus der Kierch ausgeschloss an am Februar 1411 exkommunizéiert an aus Prag erausgehäit.
Well hien ënner der Protektioun vum Kinnek stoung, konnt hien awer nach a puer Joer laang weider seng Theese verbreeden. Hie war staark beléift beim Vollek. 1412 huet hien och dem Poopst Johannes XXIII. seng Bullen iwwer d'Kräizzich an den Ablass a senge Priedegten ugegraff, wouropshin en a Liewensgefor war an huet misse fortlafen. Bis 1414 huet hien a Südbéimen op der "Geessebuerg" (Kozí Hrádek) gelieft an op der Buerg Krakovec a Mëttelbéimen. Do huet hien eng Rëtsch vu senge Wierker geschriwwen an un der Iwwersetzung vun der Bibel op Tschechesch matgeschafft. Vu 1413 un ass hien als Wanderpriedeger uechter d'Land gezunn.
1414 huet d'Konzil vu Konstanz sech mat den Onrouen, déi duerch seng Léieren entstane waren, befaasst. De Keeser Sigismund huet dem Hus e "séchere Wee" (salvus conductus) fir seng Rees hin an zeréck a fir d'Zäit vu sengem Openthalt versprach. Den Hus koum den 3. November zu Konstanz un. Den 28. November gouf e gefaange geholl an a verschiddene Prisongen agespaart, respektiv och gefoltert. De Sigismund soll zwar rosen driwwer gewiescht sinn, datt seng Garantie net agehale gi war, en huet awer näischt gemaach, fir dem Hus ze hëllefen. Hie war drop aus, d'Kroun als béimesche Kinnek vu sengem Brudder Wenzel z'ierwen, a wollt sech dofir e Ruff als dee maachen, deen d'Opstänn a Béime gezësst hätt. Kuerzerhand gouf dem Hus seng Garantie zeréckgezunn, well en net wollt op Distanz zu sengen Aussoe goen, an deemno d'Kierchlech Justiz iwwer hien z'uerteelen hätt, an net déi weltlech.
De 6. Juli 1415 gouf den Hus als Heretiker zum Doud duerch Verbrenne verurteelt, wat nach deen Dag selwer am Brill virun der Stadmauer geschouch. Seng Äsche goufen an de Rhäin geschott.