Máale djudia
From Wikipedia, the free encyclopedia
En la Galut, una máale djudia es la máale de una sivdad tradisionalmente avitada por djudios. Estas máales eran el resultado del kresimyento de Getos segregados. Se dize ke el orijen del biervo Geto viene del italiano "getto", ke kere dizir "separasyon", o del grégo Ghetonia (Γειτονία, bairro), afilu una eksplikasyon ma akseptada es ke viene de la frasa italiana "campo gheto", un are ke los fundidores de djerro en Venezia en los syeklos XIV i XV uzavan para enfriar la eskoria, ke en el lashon Veneziano se dize "gheta" i en italiano "ghetta", i ke es la parte de la sivdad ande los djudios eran huersados a bivir. El biervo idish para máale djudia es "Di yiddishe gas" (די ייִדדישע גאַס), o "La Kaleja djudia", mientres ke mellah (ملاح) es el biervo en arabo para la máale djudia, uzada espesialmente en el Maghreb i espesialmente en Marroko, afilú en Tetuan se uza el nombre en kastilyano judería (djuderia). En las rejiones de avla katalana (Katalunya, Isolas Baleares, Payis Valensiano, Roseyon, Alguero, Andorra) se uza el biervo Call, el kualo tiene el su orijin del biervo en ivrit kahal (קהל).
En Amerika, Ostralya i Afrika del Sud, egzisten máales djudias ke afilu no ivan ser kriados komo Getos segregados, ma oy endiya son kaji máales djudias, deke la tradision djudia es de bivir serka de una esnoga i serka de toda la komunita; antonses la máale tyene todo lo ke la komunita tiene menester, komo merkados, eskolas, esnogas, yeshivot i munchas vezes el bethahayim esta ariéntro de la máale. En alkunos kavzos la máale krese muncho i kaji akaba syendo un distrito kompleto de la sivdad. Munchas sivdades de Evropa, el Maghreb i el Medio Oryente tienen oy o tenían una máale djudia, komo por enshemplo: